بۇل تۋرالى مەملەكەت باسشىسى قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا سويلەگەن سوزىندە ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنىڭ ايتۋىنشا, قازاقتا «الپىس كۇن تاسىعان داريا, التى كۇندە قايتادى» دەگەن ءسوز بار. كوپ ۇزاماي قارعىن سۋ كەتىپ, جۇرت كۇندەلىكتى ومىرگە ورالادى. حالىمىز ايتقانداي ء«ار قيىندىقتىڭ قايىرى بار».
«بىرىنشىدەن, تاسقىن كەزىندە ەل بىرلىگى نىعايا ءتۇستى. ارقاداعى اعايىنعا, جايىقتاعى جۇرتقا بۇكىل قازاقستان حالقى كومەكتەسۋگە ۇمتىلدى. اپات ايماعىندا تۇراتىن ادامدار بارشا وتانداسىمىزدىڭ شىنايى جاناشىرلىعىن سەزىندى. ەكىنشىدەن, ەلدىڭ جاعدايىن جاقسارتۋ ءۇشىن ەشكىم قيىندىقتىڭ كەلۋىن كۇتىپ وتىرمايتىنى انىق. دەگەنمەن, مۇنداي اپاتتار ءبىراز شارۋانى شۇعىل قولعا الۋعا سەبەپكەر بولادى», دەدى پرەزيدەنت.
پرەزيدەنتتىڭ ايتۋىنشا, تاسقىن اياقتالعان سوڭ كەيبىر اۋىلدار تىڭ جەرگە قونىستانىپ, جاڭادان بوي كوتەرەدى. جول سالىنادى, سۋ تارتىلادى. اۋىلدارىمىز مۇلدە جاڭا كەلبەتكە يە بولادى. «جالپى, الەمدەگى ۇلكەن داعدارىستاردىڭ قارقىندى دامۋعا جول اشاتىنى بەلگىلى», دەدى ول.
«قازىرگى الاپات تاسقىن دا, تۇپتەپ كەلگەندە, ەلىمىزگە وڭ اسەرىن تيگىزەدى دەپ ويلايمىن», دەگەن پرەزيدەنت سىن ساعاتتا جۇدىرىقتاي جۇمىلعان جۇرتىمىز وسى قالپىندا ورلەۋ, جاڭعىرۋ كەزەڭىنە قادام باسقانىن, ءبارى دە جاقسى بولاتىنىن ايتتى.
ء«بارىمىز – ءبىر ەلدىڭ ازاماتىمىز. تاريح توعىستىرعان تاعدىرىمىز – ءبىر, سەنىممەن قادام باساتىن كەلەشەگىمىز – ءبىر. ءبىز ءبىرتۇتاس ۇلت رەتىندە ءاردايىم بابالار اماناتىنا ادال بولامىز. قاسيەتتى قارا شاڭىراعىمىز – قازاقستاننىڭ جارقىن بولاشاعىن بىرگە جاسايمىز. ءبىزدىڭ ماقساتىمىز – ايقىن, بۇل – ادىلەتتى قازاقستاندى قۇرۋ. مەن قازاقستان رەسپۋبليكاسىنىڭ تاۋەلسىزدىگىن قورعاۋدى پرەزيدەنت رەتىندەگى ەڭ باستى مىندەتىم دەپ سانايمىن. وسى قاستەرلى مىندەت ادىلەتتى قازاقستاندى قۇرۋ جانە بەلسەندى ءارى سىندارلى سىرتقى ساياسات جۇرگىزۋ ارقىلى عانا ورىندالادى. بيىك ماقساتقا جەتۋ ءۇشىن ءتۇرلى كەدەرگىدەن وتەمىز, بارلىق قيىندىقتى جەڭەمىز. اۋقىمدى مىندەتتەردى ورىندايمىز. ءبىز ەلىمىزدىڭ باستى قۇندىلىقتارى مەن باعىت-باعدارىنان اينىمايمىز. ازاماتتاردىڭ اماندىعىن قامتاماسىز ەتۋ – ەڭ باستى ماقسات. مەملەكەتتىلىگىمىزدى نىعايتىپ, تاۋەلسىزدىك تۋىن ءاردايىم بيىك ۇستايمىز. مەن بۇعان نىق سەنەمىن جانە سول ءۇشىن ءبارىن جاسايمىن. بۇل – مەنىڭ پرەزيدەنتتىك ءارى پەرزەنتتىك پارىزىم. ەلىمىز امان, جۇرتىمىز تىنىش بولسىن!», دەدى مەملەكەت باسشىسى.