سالبۋرىن – ساياتشىلىق جانە اڭ اۋلاۋ كاسىبىنىڭ ءبىر ءتۇرى. اڭشىلىق ماۋسىمى كەزىندە اڭشىلار توپتالىپ, اڭى مول جەرلەرگە ساپار شەگەدى. سارتابان, سارىتۇعىر قىراندار مەن ارقالى قۇر ات, ءتۇزۋ مىلتىق تۇگەل سايلانادى. اڭكوس جاندار, باپكەر قۇسبەگىلەر, ساڭلاق ساياتشىلار, قۇرالايدى كوزىنەن اتاتىن مەرگەندەر, تاجىريبەلى قاعۋشىلار, ەلگەزەك اتشى-قوسشىلار ءبارى بولادى.
بۇركىتتىڭ كۇيى مەن بابى سالبۋرىندا اڭعا سالعاندا ايقىندالادى. سوندىقتان كانىگى قۇسبەگىلەر ۇيادان العان قولبالا قۇسىن كۇن سايىن ۇزبەي اڭعا جىبەرىپ, ونىڭ ۇشىپ بارۋىن, اڭعا ءتۇسۋىن, كۇيىن قاداعالاپ, قالاي باپتاۋ كەرەك ەكەنىن مولشەرلەيدى.
بۇلاردىڭ ىشىندە ءانشى, كۇيشى, جىرشىلار دا جۇرەدى. ءبىر توپتا ون-ون بەس بۇركىت, جيىرما-وتىز ادام بولۋى دا مۇمكىن. ولار ەل-جۇرتتان اۋلاق يەنگە شىعىپ, قوس تىگىپ, ايلاپ, كەيدە بىرنەشە ايلاپ (ادەتتە قاراشادان اقپاننىڭ اياعىنا دەيىن) جاتىپ, اڭ اۋلايدى. كۇندىز جان-جاققا بىتىراپ, اڭ اۋلاۋعا كەتەدى دە, كەشكىلىك قوسقا جينالادى. ءبىر جاعىندا اۋلانعان تۇلكى, قارساق, قاسقىردىڭ تەرىسىنە ءشوپ, سابان تىعىلىپ جاتسا, ەكىنشى جاقتا قوڭىر اڭدار (بۇعى, مارال, ارقار) سويىلىپ, تاباق-تاباق قارا قۋىرداق, ەت تارتىلىپ جاتادى. قۇرت, سۇزبە قاتىق قوسىلعان قارساق جون سورپانى اياق-اياعىمەن سىمىرىسەدى. ات-كولىك وتقا قويىلادى, بۇركىت باپتالادى.
بۇركىتتى قالاي كۇتىمگە الىپ, اڭعا سالۋ كەرەكتىگى جاستارعا ۇيرەتىلەدى. سالبۋرىنعا شىعۋشىلار اڭگىمە-دۇكەن قۇرىپ, ءازىل-سىقاق ايتىسىپ, ءبىر-بىرىمەن قۇسبەگىلىك تاجىريبەلەرىمەن بولىسەدى. قوڭىر اڭنىڭ ەتىن جەپ, قىمبات تەرىلەرىن الىپ, شيپالى ءدارى-دارمەك, ءشوپ-شالامىن ارتىپ, ءارى ساياحات, ءارى ساۋدا جاساۋ – وزىنشە ءبىر عانيبەت.
ىلگەرىدە سالبۋرىنعا اڭ قاعۋشىلارمەن بىرگە ءىزشى, مەرگەندەر, تىپتەن ءانشى-كۇيشى, كوڭىل كوتەرەتىن اقىن, سال-سەرى قاتارلى سەرۋەندەپ دەمالعىسى كەلەتىن, قۇسبەگىلىكتى قىزىقتايتىن ادامدار بىرگە اتتاناتىن بولعان. جالعىز-جارىم اڭشىلىقتان گورى رۋ-تايپا, اۋىل-ايماق بولىپ ساحاراعا اڭعا شىعىپ, بايتاق القاپتى قاۋمالاسا سۇزەتىن ءداستۇر قالىپتاسقان.
مۇنداي جويقىن اڭشىلىقتىڭ سورابى – ۇستىرتتەگى «قۇپيا سىزىق» اتالىپ جۇرگەن ايگىلى قالتا اۋىز ۇرا قازبالارى. نەمەسە كەزىندە ش.ءۋاليحانوۆ تامسانا جازعان, ءىزى كۇنى بۇگىن سايراپ جاتقان ىلە مەن تارباعاتاي اراسىنداعى ۇلكەن ۇرا ۇلى اڭشىلىق سالبۋرىننىڭ ءىزى دەۋگە سايادى. ەرتەرەكتە سالبۋرىنعا قىستىق سوعىمعا ەت دايىنداۋ ءۇشىن, ال سوعىس پەن اشارشىلىق كەزدەرىندە تاماق قورىن قامداۋ ماقساتىندا شىققان. سالبۋرىندا اۋلانعان اڭدى قاتىسقان ادامدار تەڭ ءبولىپ الادى. ال اۋىلعا كەلگەندە «اڭشىدان سىرالعى, باتىردان ولجا» دامەتۋ سالتى بار.