اگروونەركاسىپتىك كەشەندەگى مەملەكەتتىك ينسپەكتسيا كوميتەتى رەسەي فەدەراتسياسىنان اكەلىنگەن 2 700 دانا قىزاناق تۇقىمىندا ۆيرۋس انىقتالعانىن حابارلادى, دەپ جازادى Egemen.kz.
ۆيرۋسپەن زالالدانعان ءونىمدى ەلوردا اۋماعىنا اكەلۋگە تىيىم سالىندى, كەيىن تاۋار ارنايى مامانداندىرىلعان پەشتە جويىلدى.
«تۇقىم يەسىنە اكىمشىلىك ءىس قوزعالىپ, 103 مىڭ تەڭگە كولەمىندە ايىپپۇل سالىندى», دەلىنگەن حابارلامادا.
قىزاناقتىڭ قوڭىر قاتپارلى ۆيرۋسى (توباموۆيرۋس, ToBRFV) سول ءونىمنىڭ تۇقىمىندا ساقتالادى. مامانداردىڭ ايتۋىنشا, اتالعان ۆيرۋس ادام دەنساۋلىعىنا قاۋىپ توندىرمەيدى, الايدا بايلانىس ارقىلى تەز تاراپ, بارلىق داقىلدى زاقىمدايدى.
ودان بولەك, باتىس گۇل ءتريپسى ۆيرۋسىمەن زاقىمدالعان 1 320 دانا راۋشان, حريزانتەما جانە گيپسوفيلا گۇلدەرىنىڭ كەسكىندەرى دە ورتەلدى. اكىمشىلىك قۇقىق بۇزۋشىلىق كودەكسى بويىنشا ءىس قوزعالىپ, ءونىم يەسى 251 مىڭ تەڭگە ايىپپۇل ارقالادى.