جايىق ورال قالاسىنىڭ تۇسىندا قاۋىپتى دەڭگەيدەن استى

ەڭ سوڭعى اقپارات بويىنشا وڭىردە وزەن بويىندا ورنالاسقان 3 294 ساياجاي ءۇيىن سۋ باسقان, بۇل تۇسكە دەيىنگى مالىمەت. 13 819 ادام قاۋىپسىز جەرگە كوشىرىلدى. ونىڭ ىشىندە 5 725 بالا, 19 مۇمكىندىگى شەكتەۋلى جان بار. ەۆاكۋاتسيالىق پۋنكتتەردە قازىر 2 300 ادام ورنالاسقان. 11 519 ادام ءوز قالاۋىمەن تۋىستارىن پانالاپ ءجۇر.

«سوڭعى تاۋلىكتە جايىق وزەنى 24 سم-گە كوتەرىلدى. تاڭعى ساعات 8:00-دە قاۋىپتى دەڭگەيدەن 2 سانتيمەترگە استى. سول سەبەپتى جەر بەدەرى تومەن نۇكتەلەردە قاۋىپتىڭ بەتى سەيىلگەن جوق. ءبىز ول جەرلەرگە الدىن الا قۇلاقتاندىرۋ جۇرگىزدىك, ايەلدەر مەن بالالاردى, قارتتاردى ەۆاكۋاتسيا جاسادىق. قالعان ادامداردان دا قاۋىپتى ايماقتان ءوز ەركىمەن كەتۋىن سۇرايمىز. سۋ دەڭگەيى ءالى دە كوتەرىلىپ, 9 مەترگە جەتۋى مۇمكىن. وبلىس بويىنشا جاعداي قازىر وتە كۇردەلى, بىراق قاتاڭ باقىلاۋدا», دەدى باتىس قازاقستان وبلىستىق توتەنشە جاعدايلار دەپارتامەنتىنىڭ رەسمي وكىلى نۇرجان تولەۋىش.

وڭىردە تاسقىنعا قارسى جۇمىس قىزۋ ءجۇرىپ جاتىر. قالانىڭ وزەن جاعالاۋىنداعى قورعانىس بوگەندەرى نىعايتىلىپ, جاڭا بوگەندەر تۇرعىزىلىپ جاتىر. سوڭعى تاۋلىكتە, 20-ءساۋىر كۇنى عانا وبلىس اۋماعىندا 81 مىڭنان اسا قاپشىق قۇم توسەلگەن ەكەن. ال تاسقىن باستالعالى توسەلگەن قۇمنىڭ سانى 1 173 مىڭ قاپشىقتان اسىپ كەتكەن.

وڭىردە بۇرىنعىشا 9 ەلدىمەكەنمەن اۆتوكولىك قاتىناسى جوق. اۆتوجولداردىڭ 20 بولىگىن سۋ شايىپ, بۇزعان. قازىر ول جەرلەر پوليتسيا باقىلاۋىندا تۇر.

ايتپاقشى, قاۋىپتى وڭىرلەردەن 4 925 ءۇي جانۋارى شىعارىلىپ, باعىلىپ جاتىر.

اپاتتان قۇتقارۋ جۇمىستارىنا 10 663 ادام, 1 927 تەحنيكا, 213 سۋ سورۋ قۇرالى, 197 قايىق جانە 5 تىكۇشاق جۇمىلدىرىلعان.

ءساۋىردىڭ 21-ءى كۇنى وزەن سۋى قاۋىپتى شەكتەن اسقان كەزدە وسى كەزگە دەيىن ادامنىڭ كۇشىمەن ۇستاپ تۇرعان ساياجاي قاۋىمداستىقتارى بىرىنەن سوڭ ءبىرى سۋعا كەتە باستادى. بۇل ايماقتىڭ تۇرعىندارى ءبىر اپتا بۇرىن كوشىرىلگەن. دۇنيە-مۇلكىن كۇزەتىپ, كەتپەي قالعان كەيبىر تۇرعىنداردى پوليتسيا مەن قۇتقارۋشىلار ەرىكسىز كوشىرۋگە كىرىستى. 

«ستەنوۆيك ساياجاي قوعامىندا 820 ۋچاستوك بولسا, وسىندا 190 وتباسى قىسى-جازى تۇراقتى تۇرادى. ءبىز تۇرعىنداردى ءبىر اپتا بۇرىن كوشىردىك. بۇگىن كەتپەي قالعان ساناۋلى ادامدى قارسىلىعىنا قاراماي شىعارىپ جاتىرمىز»,  دەپ حابارلادى ورال قالالىق توتەنشە جاعدايلار باسقارماسىنىڭ باستىعى امانگەلدى ەشمۇحانوۆ.

ورال قالاسىنىڭ ماڭىندا ورنالاسقان كوسموس جانە كوماروۆ ساياجايلارىندا دا وسى كەزگە دەيىن ۇيىنەن كەتۋدەن باس تارتقان جەرگىلىكتى تۇرعىندار شۇعىل ەۆاكۋاتسيالانىپ جاتىر. وسى ساعاتتا قۇتقارۋشىلار ۇيلەرىنىڭ توبەسىندە تۇرعان 4 تۇرعىندى قۇتقارىپتى.

«ازاماتتاردى سۋ باسقان ايماقتان ەۆاكۋاتسيالاۋ وپەراتسياسىن توتەنشە جاعداي ءمينيسترى چينگيس ءارينوۆتىڭ ءوزى ۇيلەستىرىپ وتىر», دەپ حابارلادى تج ءباسپاسوز حاتشىسى. قازىر تىكۇشاق اۋەگە كوتەرىلىپ, قۇتقارۋشىلار قايىقپەن, درونمەن ساياجاي اۋماعىندا ءجۇر.

21-ساۋىردە زاچاگانسك كەنتى اۋماعىنداعى «كوسموس», «ستەنوۆيك», «وتدىح», «كوماروۆو», «ۋرالوچكا», «دوروجنيك» ساياجايلارىن سۋ باسقانى حابارلاندى. بۇل جەردە 820 ساياجاي تەلىمى بولعان. 585 ادام الدىن الا قاۋىپسىز جەرگە كوشىرىلگەن.

باتىس قازاقستان وبلىسى