سولتۇستىك قازاقستان وبلىسىندا تاسقىننىڭ ءبىرىنشى كەزەڭىنىڭ شارىقتاۋ شەگى ءوتتى. بوگەتتىڭ جوتاسى ارقىلى ەڭ كوپ سۋ تولىپ كەتۋدىڭ بيىكتىگى 425 سم بولدى, سالدارىنان 3 419 ءۇي سۋ استىندا قالدى, ولاردىڭ 3 223-ءى ءالى ءۇي سۋ استىندا قالىپ تۇر, 196 ۇيدە قاۋىپ جويىلدى. بۇل تۋرالى سقو اكىمى اپپاراتىنىڭ جۇمىلدىرۋ دايىندىعى جانە ازاماتتىق قورعاۋ ءبولىمىنىڭ باسشىسى سەرىك عايسين ورتالىق كوممۋناتسيالار قىزمەتى الاڭىندا وتكەن بريفينگتە مالىمدەدى, دەپ حابارلايدى Egemen.kz.
ونىڭ ايتۋىنشا, 15 ساۋىردەن باستاپ اقمولا وبلىسىنىڭ سۋ دەڭگەيىنىڭ قايتا كوتەرىلۋىنە بايلانىستى ەكىنشى تولقىن باستالىپ كەتتى.
«قازىرگى ۋاقىتتا سەرگەەۆ سۋ قويماسىندا ەڭ جوعارى دەڭگەيلەر ءوتتى. ەكىنشى تولقىننىڭ شىڭىن 21-22 ساۋىردە كۇتەمىز. ءبىرىنشى تولقىن پەتروپاۆل قالاسىندا باسىلىپ كەلەدى, 21 - ساۋىردەگى دەڭگەي 1136 سم. ەكىنشى تولقىننىڭ وسى ايدىڭ سوڭىنا دەيىن وتەتىنى كۇتىلىپ وتىر. سونىمەن قاتار سۋ باسقان ۇيلەر سانىنىڭ ارتۋىن كۇتپەيمىز. كەلتىرىلگەن ماتەريالدىق زالال ءۇشىن وتەماقى الۋعا وتىنىشتەردى قابىلداۋ بويىنشا جۇمىستار جۇرگىزىلىپ جاتىر», دەپ اتاپ ءوتتى سپيكەر.
1717 وتباسى 100 اەك مولشەرىندە, جالپى سوماسى 634 ملن تەڭگەنى قۇرايتىن بىرجولعى تولەم العان. وبلىسقا رەسپۋبليكا وڭىرلەرىنەن جانە ومبى قالاسىنان 576 توننا گۋمانيتارلىق كومەك اكەلىنىپتى.
14 388 ادام ەۆاكۋاتسيالانىپ, 764 ادام ۇيگە قايتارىلعان. قازىرگى ۋاقىتتا زارداپ شەككەندەردى ۋاقىتشا تۇرعىن ۇيگە كوشىرۋ جۇزەگە اسىرىلىپ جاتىر.