شاراينا
فرانتسيا پرەزيدەنتى فرانسۋا وللاند ۋكرايناداعى داعدارىستى شەشۋگە قول جەتكىزىلگەن جاعدايدا, رەسەيگە قارسى ەنگىزىلگەن حالىقارالىق سانكتسيالاردى الىپ تاستاۋدى ۇسىندى.
«فرانس-پرەسس» اقپارات اگەنتتىگىنىڭ حابارلاۋىنشا, پرەزيدەنت «قول جەتكىزىلمەگەن جاعدايدا سانكتسيا ءوز كۇشىندە قالادى» دەپ ەسكەرتىپتى. فرانسۋا وللاند, سونداي-اق, استاناداعى كەزدەسۋدە دونباسستاعى جانجالدى توقتاتۋدىڭ جولدارىن ىزدەستىرۋدە جاڭا ىلگەرىلەۋشىلىككە جەتۋگە بولاتىنىنا ءۇمىتتى ەكەنىن دە بىلدىرگەن. «مەن 15 قاڭتاردا استاناعا ءبىر عانا جاعدايمەن – بىزدەر جاڭا ىلگەرىلەۋشىلىككە قول جەتكىزەتىن بولامىز دەپ بارامىن. جانە مەن سولاي بولادى دەپ ويلايمىن», – دەپتى فرانتسيا پرەزيدەنتى.
قارجىدان قاعىلۋ وڭاي ەمەس
قىتاي پوليتسياسى ۇجىمداسقان تۇردە وزدەرىن وزدەرى ولتىرمەك بولعان 12 ادامدى رايىنان قايتاردى. ولار مۇنداي قادامعا ۆەنچۋرلىق قورعا ينۆەستور رەتىندە سالعان قارجىلارىنان قاعىلىپ قالعان سوڭ بارعان.
جەرگىلىكتى باسىلىمداردىڭ جازۋىنشا, امالى تاۋسىلعان ون ەكى ادام بىرىگىپ, شوچجوۋ قالاسىنداعى التى قاباتتى اكىمشىلىك عيماراتىنىڭ توبەسىنە شىعىپ, ودان سەكىرەمىز دەپ قورقىتقان. ءارى ولار قاشىپ كەتكەن قور باسشىسىنىڭ الاياقتىق جاساعان ىسىنە ارالاسۋدى تالاپ ەتكەن. جەرگىلىكتى بيلىكتىڭ مالىمدەۋىنشە, كومپانيانىڭ ءۇش وكىلى كۇدىكتى رەتىندە قاماۋعا الىنىپتى. ال قوردىڭ باسشىسى ىزدەستىرىلۋدە ەكەن.
قىرىققا جۋىق ادامدى ۇرلاپ كەتتى
نيگەريادا سودىرلار 40-قا جۋىق ادامدى ۇرلاپ كەتتى. ولاردىڭ كوپشىلىگى جاس جىگىتتەر مەن ءجاسوسپىرىم بالالار.
جەرگىلىكتى تۇرعىندار مەن پوليتسيا وكىلدەرى بۇل قىلمىستى «بوكو حارام» ەكسترەميستىك ۇيىمى جۇزەگە اسىرعانىن ايتادى. كۋاگەرلەردىڭ ايتۋىنشا, مۇزداي قارۋلانعان سودىرلار مالاري دەرەۆنياسىنا باسىپ كىرىپ, تۇرعىندارعا بەرىلگەن بۇيرىقتى مۇلتىكسىز ورىنداۋدى تالاپ ەتكەن. قازىرگى كەزدە بۇل ەلدى مەكەندە بىردە-ءبىر جاس قالماعان كورىنەدى. ال وتكەن جىلى اتالعان ەكسترەميستىك ۇيىمنىڭ ۇرلاعان ادامدارى جۇزدەپ سانالادى.
قىسقا قايىرىپ ايتقاندا:
*كەشە لەنينگراد وبلىسىنىڭ اۋماعىندا جول-كولىك اپاتى سالدارىنان بەس جولاۋشى مەن ءبىر تاكسي جۇرگىزۋشى قازا تاپتى. قايعىلى جاعداي سانكت-پەتەربۋرگ – پسكوۆ ارالىعىنداعى كۇرە جولدا ورىن الدى.
*بەلگيانىڭ ادىلەت مينيسترلىگىنىڭ كوميسسياسى ءومىر بويى تۇرمەدە وتىرۋ جازاسىنا كەسىلگەن فرانك ۆان دەن بليكەندى ۋلى ءدارى ەگۋ ارقىلى ءولتىرۋدىڭ داتاسىن اتادى. بۇل 11 قاڭتاردا بريۋگگەدەگى تۇرمەنىڭ كلينيكاسىندا جۇزەگە اسىرىلادى.
*يەمەننىڭ وڭتۇستىك-باتىسىنداعى دامار قالاسىندا ءوتىپ جاتقان شيتتەردىڭ جيىنىندا جارىلعىش قۇرال ىسكە قوسىلىپ, التى ادامنىڭ ءومىرىن قيدى. ونىڭ بىرەۋى – جۋرناليست.
اۋا رايىنىڭ قولايسىزدىعىنان كانادانىڭ كۆەبەك پروۆينتسياسىندا 135 مىڭنان استام ءۇي جارىقسىز قالدى. مەتەورولوگيا قىزمەتىنىڭ مالىمەتىنە قاراعاندا, ەلدىڭ بىرقاتار پروۆينتسياسىندا قالىڭ قار جاۋىپ, اياز كۇشەيە تۇسەدى.
وپپوزيتسيانىڭ جاڭا باسشىسى سايلاندى
سيريانىڭ ۇلتتىق وپپوزيتسيالىق جانە رەۆوليۋتسيالىق كۇشتەرى كواليتسياسى وزدەرىنىڭ جاڭا جەتەكشىسى ەتىپ حالەد حودجانى سايلادى. ول 56 داۋىس جيناعان. ال حيشام مارۋاح ۆيتسە-پرەزيدەنت تىزگىنىن ۇستاعان.
«نوۆوستي» اقپارات اگەنتتىگىنىڭ حابارلاۋىنا قاراعاندا, كواليتسيانىڭ قازىرگى باسشىسى حادي ءال-باحرا قايتا سايلانۋعا ءوز كانديداتۋراسىن ۇسىنۋدان باس تارتىپتى. كەيبىر دەرەك كوزدەرى سيرياداعى قاقتىعىستاردى تالقىلاۋ ماسەلەسى رەسەيلىكتەر ۇسىنعان پىشىندە وتكەنى ءجون ەكەندىگىن ايتادى. بۇل ۇسىنىسقا سيريالىق كواليتسيا وكىلدەرى دە كەلىسكەن سياقتى. كەلىسسوز قاي كۇنى وتەتىنى قازىرگە بەلگىسىز.
مەرزىمىنەن بۇرىن تۇرمەدەن بوساتىلدى
تايۆاننىڭ بۇرىنعى پرەزيدەنتى چەن شۋيبيان دەنساۋلىق جاعدايىنىڭ ناشارلاۋىنا بايلانىستى تۇرمەدەن مەرزىمىنەن بۇرىن بوساتىلدى. بۇل جونىندە ەلدىڭ ادىلەت مينيسترلىگى حابارلادى.
الپىس ءتورت جاستاعى چەن شۋيبيان سىبايلاس جەمقورلىققا سالىنعانى ءۇشىن 20 جىل مەرزىمگە سوتتالعان بولاتىن. ول تۇرمەدە التى جىل وتىردى. ەكس-پرەزيدەنت چ.شۋيبيان 2008 جىلى قاماۋعا الىنىپ, جۇرگىزىلگەن تەرگەۋ بارىسىندا ونىڭ 15 ميلليون دوللاردى قۇرايتىن قارجىنى جىلىستاتقانى انىقتالىپتى. سوتتا ول وزىنە قارسى قوزعالعان قىلمىستىق ءىس ەلدىڭ قازىرگى پرەزيدەنتى ما ءينتسزيۋدىڭ نۇسقاۋىمەن جاسالعانىن ايتقان ەكەن. شۋيبيان بيلىكتە 2000-2008 جىلدارى ارالىعىندا بولدى.
جىل باسىنداعى العاشقى جارىلىس
پاكىستاندا فۋتبول ويىنى كەزىندەگى جارىلىستان بەس ادام مەرت بولىپ, ون ءبىر ادام جاراقات الدى. قازا تاپقانداردىڭ ۇشەۋى – ويىنشى.
بيلىك وكىلدەرىنىڭ ءمالىمەتىنشە, جارىلعىش زات كالايا قالاسىنداعى ستاديوندا فۋتبولدان جارىس ءوتىپ جاتقان كەزدە ىسكە قوسىلعان. قازىرگە بۇل تەررورلىق ارەكەتتى ەشقانداي ۇيىم ءوز جاۋاپكەرشىلىگىنە العان جوق. ەلدىڭ پرەمەر-ءمينيسترى ناۆاز شاريف وسى وقيعانى بيىلعى جىلعى العاشقى اسا ءىرى تەررورلىق ارەكەت دەپ مالىمدەدى.
ينتەرنەت ماتەريالدارى نەگىزىندە ازىرلەندى.