تاسقىن سۋ سالدارىنان بىرقاتار ءوڭىردىڭ مەكتەپتەرى وقۋشىلاردى قاشىقتان وقىتۋعا كوشكەنى ءمالىم. سەناتور عالياسقار سارىباەۆ ءوزىنىڭ دەپۋتاتتىق ساۋالىندا تاسقىن سۋدان زارداپ شەككەن ءوڭىر تۇلەكتەرىنىڭ ۇبت-عا دايىندىق ماسەلەسىن كوتەردى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەناتوردىڭ ايتۋىنشا, مەملەكەتتىك ءبىلىم بەرۋ گرانتتارى بويىنشا كونكۋرسقا قاتىسۋعا ارنالعان ۇبت-عا دايىندىقتى توتەنشە جاعداي وزگەرتىپ جىبەردى. سالدارىنان وقۋشىلاردىڭ الداعى تەستىگە ساپالى دايىندالۋعا مۇمكىندىگى جوق. بالالاردى ۇبت-عا دايىنداۋ سالاسىنداعى رەتتەۋدى مەملەكەتتىك ورگاننىڭ بىردە-بىرەۋى جۇزەگە اسىرمايدى. ويتكەنى وقۋ-اعارتۋ مينيسترلىگىندە دە, عىلىم جانە جوعارى ءبىلىم مينيسترلىگىندە دە اتالعان مىندەت كوزدەلمەگەن.
«تالاپكەرلەر ءبىر مەكەمەگە وقۋشى ەمەس, ەكىنشىسى ءۇشىن ءالى ستۋدەنت ەمەس. وسىعان بايلانىستى زارداپ شەككەن ايماقتارداعى وقۋ بىتىرەتىن تۇلەكتەردىڭ تاعدىرىنا الاڭداپ وتىرمىز. تابيعي اپاتقا بايلانىستى سول بالالاردىڭ ۇلتتىق بىرىڭعاي تەستىلەۋدە تومەن ناتيجە الۋ قاۋپى بار. سوندىقتان ولار مەملەكەتتىك ءبىلىم گرانتتارىن الا الماي قالۋى مۇمكىن», دەدى عالياسقار سارىباەۆ.
وسىعان بايلانىستى دەپۋتات تالاپكەرلەردى دايارلاۋ ماسەلەسىن شەشۋ ماقساتىندا ءتيىستى شارا قولدانۋدى سۇرادى. اسىرەسە, تۇلەكتەردىڭ قۇجاتتارىن تەزىرەك قالپىنا كەلتىرۋگە جاردەم كورسەتۋ تۋرالى مينيسترلىكتەرگە ۇسىنىس ايتىلدى. تەستىلەۋدىڭ ەكىنشى سەسسياسىنىڭ باسىندا ۇبت وتكىزۋ پۋنكتتەرىنىڭ قىزمەتىن قالپىنا كەلتىرۋ قاجەتتىگى اتاپ ءوتىلدى.