«قورعاس – شىعىس قاقپاسى» ارنايى ەكونوميكالىق ايماعى (اەا) قىتاي, ورتالىق ازيا, ورتا شىعىس جانە ەۋروپانى بايلانىستىراتىن ستراتەگيالىق نىسان. ەكونوميكاعا ۇلكەن پايدا اكەلەتىن ايماقتىڭ الەم ەلدەرىمەن قاتىناسىن كەڭەيتۋ ماڭىزدى. ول ءۇشىن حالىقارالىق اۋەجاي قاجەت. شەتەلدىك ينۆەستورلار وسى باعىتتا قارجى قۇيۋعا نيەتتى ەكەنىن جەتكىزدى. كوپ ۇزاماي جەتىسۋدا زاماناۋي اۋە ايلاعى سالىنادى.
«قورعاس» ءىرى لوگيستيكالىق حابىنا «The Hansa Consortium» كومپانياسى 250 ملرد تەڭگە قارجى قۇيماقشى. بىرلەسكەن جوبانىڭ جۇزەگە اسۋى 700 جۇمىس ورنىن قۇرادى دەپ كۇتىلەدى. جوبا قۋاتى 50 مىڭ توننا جۇك تاسىمالداۋعا, جولاۋشىلار تەرمينالىنان ساعاتىنا 500 ادامعا دەيىن وتكىزۋگە قابىلەتتى.
«بۇگىندە «قورعاس – شىعىس قاقپاسى» اەا-نىڭ بىرىڭعاي تىزىلىمىنە 56 قاتىسۋشى تىركەلگەن, ولاردا جالپى قۇنى 800 ملرد تەڭگەدەن اساتىن جوبالار بار. «KTZE-Khorgos Gateway» قۇرعاق پورتى – ارنايى ەكونوميكالىق ايماقتىڭ نەگىزگى نىساندارىنىڭ ءبىرى. بۇل – ورتالىق ازياداعى اۋماعى 103 گەكتارعا جۋىق جەردى الىپ جاتقان ەڭ ءىرى قۇرعاق پورت جانە تەڭىز لوگيستيكالىق حابتارىنىڭ ايرىقشا بالاماسى. اەا اۋماعىندا ينۆەستورلار ءۇشىن, سول قاتاردا شەتەلدىك ينۆەستورلار ءۇشىن دە جەڭىلدىكتەر مەن ارتىقشىلىقتار, ارنايى تاريفتەر قولدانىلادى. قاتىسۋشى سانى جىل سايىن ارتىپ كەلە جاتقاندىقتان, اۋماقتا حالىقارالىق جۇك-جولاۋشىلار اۋەجايىنىڭ اشىلۋى ترانزيتتىك الەۋەتتى ودان ءارى دامىتۋعا وڭ ىقپال ەتەدى», دەدى وبلىس اكىمى بەيبىت يساباەۆ ينۆەستورلارمەن كەزدەسۋدە.
«Skymax tehnologies» كومپانيالار توبى» جشس باس ديرەكتورى ەرىك شورتانباەۆتىڭ ايتۋىنشا, ءۇش كەزەڭنەن تۇراتىن جوبا اياسىندا حالىقارالىق جۇك-جولاۋشىلار اۋەجايىن سالۋدان بولەك, قاجەتتى ينفراقۇرىلىممەن قامتۋ, وندىرىستىك قۋاتتى ۇلعايتۋ, قوناقۇي, ساۋدا-ويىن-ساۋىق ورتالىعىن ىسكە قوسۋ كوزدەلگەن. وسىلايشا, جوبا 2032 جىلى تولىعىمەن اياقتالادى. بىراق اۋەجاي 2027 جىلى پايدالانۋعا بەرىلەدى دەپ جوسپارلانعان.
ە.شورتانباەۆتىڭ ايتۋىنشا, جوبانى ىسكە اسىرۋدىڭ ءبىرىنشى كەزەڭىندە اۋەجايدىڭ نەگىزگى ينفراقۇرىلىمى سالىنادى, ال ەكىنشى جانە ءۇشىنشى كەزەڭدەردە قوسىمشا ينفراقۇرىلىمداردى اياقتاۋ, جولاۋشىلار تەرمينالىنىڭ وتكىزۋ قابىلەتىن, جۇك جانە وتىن قويمالارىنىڭ قۋاتىن كەڭەيتۋ قاراستىرىلعان. سونداي-اق ينۆەستورلار ساۋدا, تۋريستىك قىزمەت, تاماقتانۋ جانە ورنالاستىرۋ قىزمەتتەرىنىڭ كەشەنىن كەڭەيتىپ, دامىتۋعا نيەتتى. اتاپ وتسەك, اۋە لاينەرلەرىنە زاماناۋي Jet a-1 وتىنى پايدالانىلماق.
بەيبىت يساباەۆتىڭ سوزىنشە, جوبانى ىسكە اسىرۋ ءۇشىن مەملەكەت تاراپىنان قاجەتتى قولداۋ كورسەتىلەدى.
«ستراتەگيالىق ماڭىزدى جوبانىڭ ءساتتى اياقتالۋى ءۇشىن سىرتقى ينفراقۇرىلىمدى جۇرگىزۋ ماسەلەسىندە زاڭ اياسىندا قاجەتتى قولداۋ كورسەتۋگە دايىنبىز. سىزدەردىڭ قانداي مىندەتتەمە الاتىندارىڭىزدى, ءبىزدىڭ تاراپىمىزدان ناقتى قانداي قولداۋ كەرەكتىگىن, سونىڭ ءبارىن ءار كەزەڭگە ەگجەي-تەگجەي ناقتى بەلگىلەۋ كەرەك», دەدى ءوڭىر باسشىسى. كەزدەسۋ سوڭىندا تاراپتار ىنتىماقتاستىق تۋرالى مەموراندۋمعا قول قويدى.
جەتىسۋ وبلىسى