كەشە ۇكىمەت ۇيىندە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ قىسقى جىلىتۋ ماۋسىمىنىڭ بارىسى جانە الەۋمەتتىك ماڭىزى بار ازىق-ت ۇلىك تاۋارلارىنىڭ باعاسى تۋرالى سەلەكتورلىق كەڭەس وتكىزدى.
كەڭەس جۇمىسىنا مينيسترلىكتەر مەن مەملەكەتتىك مەكەمەلەردىڭ باسشىلارى, وبلىستار جانە استانا, الماتى قالالارىنىڭ اكىمدەرى قاتىستى.
ەنەرگەتيكا مينيسترلىگىنىڭ ءمالىمەتى بويىنشا رەسپۋبليكا تۇرعىندارىن ەلەكتر جانە جىلۋ قۋاتىمەن قامتۋ تۇراقتى رەجىمدە جۇزەگە اسىرىلۋدا. ءوتىپ بارا جاتقان جىل باسىنان بەرى ەلىمىزدە 93 ميلليارد كۆت. ساعات ەلەكتر قۋاتى وندىرىلگەن. بۇل – وتكەن جىلعىدان 2,1 پايىزعا ارتىق. قۋات كوزدەرى قويمالارىندا 4,5 ميلليون توننا كومىر, 157 مىڭ توننا مازۋت قورى جيناقتالعان. بۇلار – قور نورماسىنا سايكەس كەلەتىن كورسەتكىشتەر. قۋات ءوندىرۋشى جانە جەتكىزۋشى كاسىپورىنداردىڭ نەگىزگى قۇرال-جابدىقتارىنا جوندەۋ جۇمىستارى جوسپارعا سايكەس جۇرگىزىلگەن.
الەۋمەتتىك ماڭىزدى ازىق-ت ۇلىكتەرگە نەگىزسىز باعا ءوسىمىن بولدىرماس ءۇشىن وڭىرلەردەگى اتقارۋشى ورگاندار باعانى تۇراقتاندىرۋ بويىنشا شارالار كەشەنىن جۇزەگە اسىرۋدا.
ۇلتتىق ەكونوميكا مينيسترلىگى وبلىس اكىمدىكتەرىمەن بىرلەسە وتىرىپ باعا قوزعالىسىنا تۇراقتى تۇردە مونيتورينگ جۇرگىزۋ ۇستىندە. ازىق-ت ۇلىك تاۋارلارىنىڭ وڭىرلىك تۇراقتاندىرۋ قورلارىن قالىپتاستىرۋ مەن پايدالانۋ جونىندەگى جۇمىستار جالعاسۋدا. الەۋمەتتىك ماڭىزى بار تاعام تۇرلەرىنە نەگىزسىز باعا كوتەرۋ, رىنوك سۋبەكتىلەرى اراسىندا جاسىرىن باعا كەلىسىمىن جاساسۋ, ساۋدا نىساندارىنا وتاندىق تاۋار وندىرۋشىلەردىڭ قاتىسۋىن شەكتەۋ وقيعالارى ورىن الا قالعان جاعدايدا قولدانىستاعى زاڭدار اياسىندا ءتيىستى شارالار قولدانىلادى. بۇتىندەي العاندا, ازىق-ت ۇلىك تاۋارلارىنىڭ باعا قوزعالىسىنا باقىلاۋ جۇرگىزۋ تەتىكتەرى جاقسى جۇمىس ىستەۋدە.
سەلەكتورلىق كەڭەستە, سونداي-اق, جاڭاجىلدىق مەرەكە كەزىندە قوعامدىق ءتارتىپتى قامتاماسىز ەتۋ ماسەلەلەرى دە قاراستىرىلدى.
كەڭەس قورىتىندىسىندا باقىتجان ساعىنتاەۆ ءتيىستى اتقارۋ ورگاندارىنا بىرقاتار تاپسىرمالار بەردى, دەپ حابارلادى پرەمەر-ءمينيستردىڭ ءباسپاسوز قىزمەتى.
سۇڭعات ءالىپباي,
«ەگەمەن قازاقستان».