مەملەكەت باسشىسى قاسىم-جومارت توقاەۆ عالىمداردى ماراپاتتاۋ راسىمىندە ءسوز سويلەدى. ول مەرەكە قارساڭىندا اقورداعا جينالىپ, باس قوسۋ جاقسى داستۇرگە اينالعانىن, بۇل – ەلىمىزدىڭ عالىمدار قاۋىمىنا دەگەن ەرەكشە قۇرمەتى جانە ايرىقشا ىقىلاسىنىڭ كورىنىسى ەكەنىن ايتتى, دەپ حابارلايدى Egemen.kz.
پرەزيدەنت الدىمەن عالىمداردى عىلىم قىزمەتكەرلەرى كۇنىمەن قۇتتىقتادى.
ء«ار ەلدىڭ عىلىمي الەۋەتى – ونىڭ ابىروي-بەدەلى مەن كۇش-قۋاتىنىڭ ولشەمى دەسەك, قاتە بولمايدى. عىلىمعا باسىمدىق بەرەتىن, عالىمىن قادىرلەيتىن, باسقاشا ايتساق, «عىلىم-ءبىلىم بار جۇرتتار» عانا وركەنيەتتىڭ ورىنە شىعادى. بۇل – اقيقات. تۇپتەپ كەلگەندە, ادامزاتتىڭ بارلىق جەتىستىگى عالىمداردىڭ زياتكەرلىك ەڭبەگىنىڭ جەمىسى ەكەنى ءسوزسىز. قازىر وسى زالدا ءتۇرلى سالادا زور تابىسقا جەتكەن زەردەلى زەرتتەۋشىلەرىمىز وتىر. سىزدەر ۇلت ساپاسىن ارتتىرۋعا, حالىقتىڭ ءال-اۋقاتىن جاقسارتۋعا مول ۇلەس قوسىپ كەلەسىزدەر. بارشاڭىزعا شىنايى ريزاشىلىعىمدى بىلدىرەمىن. حاكىم اباي ايتىپ وتكەندەي, «ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق». بۇل – ەشقاشان وزەكتىلىگىن جوعالتپايتىن تاعىلىم. ءبىز باسەكەگە قابىلەتتى ەل بولامىز دەسەك, ەڭ الدىمەن, عىلىمدى دامىتىپ, جاڭا تەحنولوگيانى, جاساندى ينتەللەكتىنى مەڭگەرۋىمىز كەرەك», دەدى پرەزيدەنت.
سونداي-اق مەملەكەت باسشىسى عىلىمعا كورسەتىلىپ جاتقان جۇيەلى قولداۋ شارالارىنا توقتالدى.
«وزدەرىڭىزگە ءمالىم, مەن وسى جىلدى تسيفرلاندىرۋ جانە جاساندى ينتەللەكت جىلى دەپ جاريالادىم. عىلىمعا بەت بۇرۋ – ءوسىپ-وركەندەۋگە ۇمتىلعان ءاربىر ەلدىڭ تاريحي مىندەتى. ءبىز مۇنى جاقسى تۇسىنەمىز. مەملەكەت عىلىم سالاسىنا ۇنەمى قولداۋ كورسەتۋدە. كەيىنگى 5 جىلدا وسى سالاعا بولىنەتىن قارجى كولەمى 6 ەسەدەن استى. قازاقستاندا زەرتتەۋ ۋنيۆەرسيتەتتەرىنىڭ سانى كوبەيىپ جاتىر. عىلىمي جوبالارعا ينۆەستيتسيا سالاتىن بيزنەس وكىلدەرىنە سالىق جەڭىلدىگى بەرىلەتىن بولدى. الدىمىزدا تاعى ءبىر ماڭىزدى مىندەت تۇر. ءبىز جاس عالىمدار عىلىممەن الاڭسىز اينالىسۋى ءۇشىن قولايلى جاعداي جاساۋىمىز قاجەت. ويتكەنى قازاق عىلىمىنىڭ بولاشاعى – كوزى اشىق, كوكىرەگى وياۋ, ويى ۇشقىر جانە ماقساتى بيىك جاستاردىڭ قولىندا», دەدى ول.
پرەزيدەنت تالاپتى ءارى تالانتتى ازاماتتار كەلەشەكتە ۇلتتىڭ شامشىراعىنا اينالاتىنىن, ولار قانىش ساتباەۆ سياقتى الىپ تۇلعالاردىڭ جولىن جالعايتىنىن, سوندىقتان جاس زەرتتەۋشىلەرگە قامقور بولۋدىڭ ماڭىزدىلىعىن اتاپ ءوتتى.
«بۇل باعىتتا ناقتى باستامالار جۇزەگە اسىرىلىپ جاتىر. قازىرگى تاڭدا 600-دەن استام جاس عالىمعا باسپانا بەرىلدى. بۇدان بولەك, ولارعا ارناۋلى گرانتتار ءبولىنىپ جاتىر. جىل سايىن جاس زەرتتەۋشىلەر الەمنىڭ جەتەكشى عىلىمي ورتالىقتارىنا بارىپ, تاجىريبە جيناپ, تاعىلىم الىپ ءجۇر. وسىنداي ناقتى شارالار الداعى ۋاقىتتا دا جالعاسىن تابادى», دەدى مەملەكەت باسشىسى.