فوتو: اقوردا
«بۇگىنگى سالتاناتتى جيىندا تاعى ءبىر جاقسى جاڭالىقتى جاريالاعىم كەلەدى. قازاق دالاسى كوپتەگەن كەمەڭگەر تۇلعالاردىڭ مەكەنى بولعانىن بىلەسىزدەر. سونىڭ ىشىندە الەمگە ايگىلى ويشىل ءال-ءفارابيدىڭ ورنى ەرەكشە. ونىڭ مۇراسى – بۇكىل ادامزاتتىڭ اسىل قازىناسى, وركەنيەت ويىنىڭ شىڭى. وسىعان وراي, مەن جوعارى مەملەكەتتىك ماراپاتتار تىزىمىنە ارنايى ء«ال-فارابي» وردەنىن ەنگىزۋ قاجەت دەپ سانايمىن. بۇل ماراپات ءبىلىم مەن عىلىم, مادەنيەت پەن رۋحانيات سالاسىندا زور تابىسقا جەتكەن ازاماتتارعا بەرىلەدى. «مەيىرىم», «قوجا احمەت ياساۋي», ء«ال-فارابي» وردەندەرى بيىل العاش رەت رەسپۋبليكا كۇنى قارساڭىندا تاپسىرىلاتىن بولادى», دەدى پرەزيدەنت.
پرەزيدەنت: ادامزاتتىڭ بارلىق جەتىستىگى – عالىمداردىڭ زياتكەرلىك ەڭبەگىنىڭ جەمىسى
«بىرلىگىمىزدى بەكەمدەپ, ءبىرتۇتاس حالىق بولىپ جارقىن بولاشاققا نىق قادام باسامىز. قاسيەتتى وتانىمىز – قازاقستاندى ءبىلىم-عىلىمنىڭ, ويلى ورتانىڭ جانە سانالى جاستاردىڭ كۇشىمەن تۇبەگەيلى جاڭعىرتامىز. كەلەر ۇرپاققا وركەنيەتتى, قۋاتتى ءارى ادىلەتتى مەملەكەتتى امانات ەتىپ قالدىرامىز. بۇل – ءبىزدىڭ ۇلتتىق پارىزىمىز. وسى تاريحي جولدا ءبىز عالىمداردىڭ وراسان زور الەۋەتىنە سەنىم ارتامىز. سەبەبى عىلىم وركەندەسە, بۇكىل ەلىمىز داميدى, شەكسىز مۇمكىندىكتەرگە جول اشىلادى. عالىمنىڭ ءاربىر جاڭالىعى تۇتاس ۇلتتىڭ مەرەيىن اسىرادى. سىزدەر قاشاندا ەل مۇددەسىنە قىزمەت ەتە بەرەسىزدەر دەپ سەنەمىن. مەملەكەت وزدەرىڭىزدى ءاردايىم قولدايدى», دەدى قاسىم-جومارت توقاەۆ.
سونداي-اق سالتاناتتى جيىندا پرەزيدەنت كونستيتۋتسيانى ازىرلەۋگە ۇلەس قوسقان عالىمدارعا ريزاشىلىعىن ءبىلدىردى.
