ەلىمىزدە باستاۋ العان «تازا قازاقستان» ەكولوگيالىق اكتسياسى اياسىندا اقشۇقىر ەلدى مەكەنىندە ورنالاسقان «قوشقار اتا» قورىمىندا تازالىق جۇمىستارى جۇرگىزىلدى, دەپ حابارلايدى قوعامدىق كوممۋنيكاتسيا ورتالىعى, دەپ حابارلايدى Egemen.kz.
سەنبىلىككە م. وسكىنباەۆ اتىنداعى ماڭعىستاۋ وبلىستىق فيلارمونياسى قىزمەتكەرلەرى مەن ق.سىديىقوۆ اتىنداعى ماڭعىستاۋ وبلىستىق امبەباپ كىتاپحاناسىنىڭ ۇجىمى اتسالىستى.
18 ءساۋىر - حالىقارالىق ەسكەرتكىشتەر مەن تاريحي ورىندار كۇنىنە وراي «تازا قازاقستان» رەسپۋبليكالىق اكتسياسىنا ءوز ۇلەسىمىزدى قوسىپ, سەنبىلىك وتكىزدىك. كوكتەم مەزگىلى جاڭارۋ مەن جاڭعىرۋ, كۇل-قوقىستان تازارۋ ماۋسىمى. تابيعاتتى ايالايىق. ءوڭىر كەلبەتىن كوركەيتۋگە ءاربىر تۇرعىن اتسالىسۋى كەرەك, دەدى م. وسكىنباەۆ اتىنداعى ماڭعىستاۋ وبلىستىق فيلارمونياسى ديرەكتورى دانيار ساعىنعالي ۇلى.
سونداي-اق, ق.سىديىقوۆ اتىنداعى ماڭعىستاۋ وبلىستىق امبەباپ كىتاپحاناسى ديرەكتورىنىڭ ورىنباسارى ىنتىماق بوجانوۆ تاريحي ورىنداردى كۇتىپ, ساقتاۋ ماڭىزى جونىندە ايتتى.
وزدەرىڭىزنە ءمالىم ەل اۋماعىندا 25 مىڭنان تاريحي-مادەني ەسكەرتكىش بار.سونىڭ بىرەگەيى — «قوشقار اتا» قورىمىن قوقىستاردان تازارتىپ جاتىرمىز. بولاشاق ۇرپاق ءۇشىن تاريحي ورىنداردى كۇتىپ ۇستاۋعا باسا ءمان بەرۋ كەرەكپىز. كوتەرىڭكى كوڭىل-كۇيمەن سەنبىلىكتى وتكەردىك, كيەلى, تاريحي-تابيعي ورىنداردىڭ قۇندىلىعىن دارىپتەۋگە اتسالىسىپ ءجۇرمىز دەپ ويلايمىن, دەدى ىنتىماق بوجانوۆ.
ايتا وتەيىك, «قوشقار اتا» قورىمى اقتاۋ قالاسىنان 17 شاقىرىم قاشىقتا سولتۇستىك-باتىس باعىتتا ورنالاسقان. قورىم جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە, سونداي-اق ماڭعىستاۋ وبلىسى بويىنشا وڭىرلىك ماڭىزى بار قاسيەتتى نىساندار تىزىمىنە ەنگىزىلگەن. زەرتتەۋ جۇمىستارىنىڭ ناتيجەسىندە قورىمنان 81 ەسكەرتكىش ەسەپكە الىنعان.