وتكەن جىلى الماتى قالاسىنىڭ تۇرعىنى ايدىن بورانباەۆتىڭ ۇستىنە قاراعاش قۇلاپ تۇسكەن. سول ساتتە ول ءوز ۆەلوسيپەدىن تۇراققا قويىپ تۇرعان ەدى. اقىرى اۋىر دەنە جاراقاتتارىن العان ەر ادام جۇمىسىن جالعاستىرا الماي, قىزمەتتەن كەتۋگە ءماجبۇر بولعان. كەلەڭسىز وقيعادان بەرى 9 اي ءوتتى, ال كىنالىلەر ءالى تابىلمادى, دەپ حابارلايدى Egemen.kz.
«جۇمىس كۇنى اياقتالعاننان كەيىن نىساننان بىرگە شىققان ارىپتەسىممەن اعاشتىڭ جانىندا قوشتاسىپ تۇردىم. ول ارى قاراي كەتتى. ال مەن ۆەلوسيپەدپەن ۇيگە قايتپاقشى بولدىم, سول كەزدە اعاشتىڭ سىنعانىنا ۇقساس دىبىس ەستىدىم. جوعارىعا قاراعان مەزەتتە ۇستىمە اعاش ءدىڭى ءتۇستى», دەدى جابىرلەنۋشى كتك تەلەارناسىنا بەرگەن سۇحباتىندا.
زارداپ شەككەن 36 جاستاعى ەر ادام قۇرىلىس الاڭىندا جۇمىس ىستەگەن. الايدا بۇل وقيعادان كەيىن ول جۇمىسىنان ايىرىلىپ قالعان. سەبەبى ونىڭ باس سۇيەگى جارىلىپ, ميى شايقالعان. دارىگەرلەردىڭ ايتۋىنشا, ونىڭ ءبىر ومىرتقاسى دا سىنعان. وتباسىندا جالعىز ءوزى جۇمىس ىستەگەن ەر ادام ايەلى مەن ەكى بالاسىن اسىراي الماي وتىر.
«قاراجاتسىز قالدىق, قارىزدانىپ ءجۇرمىن. بارلىق نەسيەلەردىڭ مەرزىمى ءوتىپ كەتكەن. جالعا العان ەكى بولمەلى پاتەردەن كوشۋگە تۋرا كەلدى», دەدى ايدىن بورانباەۆ.
ول بۇل ماسەلە بويىنشا اۋدان اكىمدىگىنە جۇگىنگەنىن تىلگە تيەك ەتتى. وقيعا بولعان جەردەگى اعاشتار جوو اۋماعىندا ءوسىپ تۇرعانى انىقتالدى. تيىسىنشە, بۇل اعاشتارعا جوو اكىمشىلىگى جاۋاپتى.
زارداپ شەگۋشىنىڭ زاڭگەرى جاندوس نيازاليەۆ جوو باسشىلىعى كىنالىلەردى ىزدەمەگەنىن, ءتيىستى كومەك كورسەتپەگەنىن ايتتى.
ايتا كەتسەك, كەلەڭسىز وقيعا وتكەن جىلدىڭ 20 ماۋسىمىندا اگرارلىق ۋنيۆەرسيتەت اۋماعىندا بولعان. توتەنشە جاعدايدان كەيىن اعاش ءىشىنارا كەسىلدى, بىراق بۇتاقتاردىڭ ءبىر بولىگى ءالى كۇنگە دەيىن كوشە ۇستىندە ءىلىنىپ تۇر.
جوو پرورەكتورى زارداپ شەككەن ەر ادام تۋرالى كەشە عانا بىلگەنىن العا تارتتى. ونىڭ ايتۋىنشا, ۋنيۆەرسيتەت ءوز اعاشتارىنا جاۋاپ بەرسە دە, ولاردى ءوز ەركىمەن كەسە المايدى, بۇل ىسپەن تەندەر جەڭىپ العان كومپانيا اينالاسۋى كەرەك.