ەلوردا تورىندە سالىنىپ جاتقان الىپ تا تەڭدەسسىز كوركەم مۇز سارايىن قولدانىسقا تاپسىراتىن كۇن تاياپ كەلەدى. استانا كەلبەتىن اجارلاندىرا تۇسەتىن عاجايىپ عيمارات جۇرت كوڭىلىن جادىراتىپ, باس قالا قوناقتارىن تامساندىراتىنى انىق.
اتالعان كوپ سالالى تاماشا عيماراتقا بايلانىستى تاپسىرمانى 2012 جىلى ەلباسى نۇرسۇلتان نازارباەۆ استانا قالاسىن ودان ءارى ورنىقتى دامىتۋعا قاتىستى وتكەن القالى جيىندا بەرگەنى بەلگىلى. سودان بەرى قۇرىلىس قارقىندى جۇرگىزىلۋدە. «باس مەردىگەر رەتىندە Mabco constructions SA كومپانياسى اتالاتىن جاۋاپتى جۇمىستار لەگىن سول 2012 جىلدىڭ قازان ايىندا باستاپ, مەجەلى بەلەستەردى كەلەسى جىلدىڭ مامىرىندا باعىندىرۋدى كوزدەۋدە. تەلىم اۋماعى 12,17 گا جەردى الىپ جاتسا, جالپى قۇرىلىس الاڭى 86 238,77 شارشى مەتر كولەمدى قۇراۋدا. مۇز ايدىنىنىڭ سىيىمدىلىعى 10300 ورىندى يەلەنسە, بالالار اكادەمياسىنىڭ سىرعاناۋ القابى 588 ورىندى ەنشىلەيدى دەپ جوسپارلانىپ وتىر. سۋدا ءجۇزۋ كەشەنىنە كەلسەك, 53ح25 مەترلىك وليمپيادالىق باسسەين 2252 ورىنعا شاقتالسا, 33ح25 مەترلىك ۇيلەسىمدى ءجۇزۋ جانە سۋعا سەكىرۋ باسسەينى 1135 ورىنعا ارنالادى دەپ بولجانۋدا», دەپ اڭگىمەلەيدى «قازاقستان تەمىر جولى» كومپانياسى «ءىرى جوبالاردى جۇزەگە اسىرۋ بويىنشا ديرەكتسياسى» فيليالىنان.
قتج قامقورلىعىنداعى «بارىس» حوككەي كلۋبىنا قۋانىش سىيلايتىن مۇز سارايى استاناداعى تۇران داڭعىلىنىڭ بويىندا ورنالاسقان. ەندى سپورتشىلار قارسىلاس كوماندانى, جانكۇيەر قوناقتاردى «ۇيدە» قارسى الۋعا ۇيالماق ەمەس. اتاپ وتەرلىك جايت, بۇل «بارىس-ارەنا» سپورتتىق كەشەنىنىڭ تمد كەڭىستىگىندە بالاماسى جوق. سونداي-اق, ەسكە سالار بولساق, ەكسپو-2017 حالىقارالىق كورمەسىنىڭ قارساڭىندا بىرنەشە حالىقتىق داستۇرگە باي, مازمۇنى ەرەكشە سالاۋاتتى ءومىر سالتىن ۇستانۋ جانە مادەني تىنىس-تىرشىلىك وشاعىنىڭ تۇساۋى كەسىلمەك.
الدابەرگەن كەمپىرباەۆ.