قىزىلوردا وبلىسىنداعى كولدەر ارناسىنا تولدى

قوستاناي وبلىسىندا توبىل وزەنىنىڭ ءىرى سۋ قويمالارى تاسقىن سۋىن قاۋىپسىز وتكىزۋدى قامتاماسىز ەتە وتىرىپ, 92% سۋ جينادى. توبىل وزەنىندە سۋدىڭ مول كەلۋى سوڭعى رەت 2000 جىلى تىركەلگەنىن اتاپ وتكىم كەلەدى, بىراق ول كەزدە دە مۇنداي قارقىندى اعىننىڭ قالىپتاسۋى بولعان جوق. سۋ اعىندارىنىڭ ارقاسىندا قازىر ەكى سۋ قويماسى دا ۇزاق ۋاقىت بويى ايماق تۇرعىندارىن قاجەتتى مولشەردە سۋمەن قامتاماسىز ەتە الادى.

استانا سۋ قويماسىن تاسقىن سۋىمەن تولتىرۋ 2 ملرد تەڭگەگە دەيىن ۇنەمدەۋگە مۇمكىندىك بەرەدى.

اقمولا وبلىسىندا استانا سۋ قويماسىن تولتىرۋ كورسەتكىشى - 99,6%. بۇل جىل بويى ەلوردا تۇرعىندارىن اۋىزسۋمەن قامتاماسىز ەتۋگە, سونداي-اق ەسىل وزەنىنىڭ گيدرولوگيالىق جاي-كۇيىن جاقسارتۋ مۇمكىندىك بەرەدى.

بىلتىر استانا سۋ قويماسىنداعى سۋ كولەمى قالانى اۋىز سۋمەن تولىق قامتاماسىز ەتۋگە جەتپەدى, سوندىقتان سۋ قويماسىن ق.ساتباەۆ اتىنداعى كانالدان قوسىمشا تولتىرۋعا تۋرا كەلدى. بۇل قاجەتتىلىكتى وتەۋ قىمباتقا شىعىپ, قۇنى 2 ملرد تەڭگەدەن اسقان ەدى.

باتىس قازاقستان وبلىسىندا جايىق وزەنى ارقىلى 1 تەكشە شاقىرىم سۋ جيناۋ جوسپارلانىپ وتىر.

باتىس قازاقستان وبلىسىندا جايىق وزەنىنەن شامامەن 1 تەكشە شاقىرىم سۋ الۋعا مۇمكىندىگى بار جايىق-كوشىم سۋارۋ جۇيەسىنە سۋ جىبەرۋ مۇمكىندىگى پايدا بولدى.

ەرتىس وزەنىنىڭ سۋ قويمالارىنان جىبەرىلگەن سۋ پاۆلودار وبلىسىنىڭ اۋىل شارۋاشىلىق قاجەتتىلىگىن وتەۋگە جانە قوستاناي وبلىسىنداعى كولدەردى تولتىرۋعا مۇمكىندىك بەردى.

شىعىس قازاقستان وبلىسىندا 10 ساۋىردەن باستاپ ەرتىس وزەنىنىڭ سۋ قويمالارى كاسكادىنان سۋ جىبەرۋ جۇزەگە اسىرىلادى. بۇل شىدەرتى-ولەڭتى ايماعىن ءتيىمدى سۋلاندىرۋعا جانە اۋليەكول كولدەرىن تولىقتىرۋعا مۇمكىندىك بەردى.

قاراعاندى وبلىسىندا جينالعان تاسقىن سۋى ءبىر جىل بويى ءوڭىر ەكونوميكاسىنىڭ قاجەتتىلىكتەرىنە جەتەدى.

قاراعاندى وبلىسىنىڭ سۋ قويمالارىندا سۋ تاسقىنىنىڭ بەلسەندى كەزەڭى ءوتتى, قازىر سۋ قويمالارى 100% تولدى. اعىنداردىڭ ءوسۋى كۇتىلمەيدى. جينالعان سۋ جىل بويىنا ايماق ەكونوميكاسىنىڭ قاجەتتىلىكتەرىن تولىعىمەن وتەۋگە مۇمكىندىك بەرەدى.

ۇلىتاۋ وبدىسىنداعى سۋ قويماسىنان جىبەرىلگەن سۋ العاش رەت قىزىلوردا وبلىسىنىڭ كولدەرىن تولتىردى.

ۇلىتاۋ وبلىسىندا كەڭگىر سۋ قويماسىن پايدالانۋ تاريحىندا العاش رەت 270 ملن تەكشە مەتر كولەمىندە ەڭ كوپ سۋ جىبەرۋ جاعدايى تىركەلدى. وسىعان بايلانىستى كەڭگىر سۋ قويماسىنان جىبەرىلگەن سۋ سارىسۋ وزەنى ارقىلى قىزىلوردا وبلىسىنىڭ كولدەرىنە ءتۇستى.

قىزىلوردا وبلىسىنىڭ تەلىكول كولدەر جۇيەسىنىڭ قارقىندى سۋ جيناۋى بايقالادى, بۇل ءوڭىردىڭ اۋىل شارۋاشىلىعىنا جاعىمدى اسەر ەتۋى ءتيىس.

ىلە وزەنى ارقىلى بالقاش كولىنە 2,3 تەكشە شاقىرىم سۋ ءتۇستى. 

ىلە ترانسشەكارالىق وزەنىنىڭ اعىنى الماتى وبلىسىنىڭ قاپشاعاي سۋ قويماسىنان بالقاش كولىنە شامامەن 2,3 تەكشە شاقىرىم كولەمىندە ەكولوگيالىق ماقساتتا سۋ جىبەرۋگە مۇمكىندىك بەردى.

جالپى, تاسقىن سۋى بارلىق سۋ قويمالارىن تولتىرۋعا, ءتىپتى قۇرعاق ايماقتاردا دا سۋ جيناۋعا مۇمكىندىك بەردى. بۇل اۋىل شارۋاشىلىعى, ونەركاسىپ جانە اۋىزسۋ ءۇشىن ماڭىزدى. سونداي-اق اتىراۋ وبلىسىنا كەلگەن تاسقىن سۋى كاسپي تەڭىزىنە جىبەرىلەتىنىن, ول ءۇشىن قازىر قوسىمشا كانال قازىلىپ جاتقانىن قوسا كەتۋ كەرەك. ياعني سۋ رەسۋرستارى جانە يرريگاتسيا مينيسترلىگى قازىر سۋ قويمالارىندا جينالعان تاسقىن سۋىن ۇتىمدى پايدالانۋ بويىنشا بەلسەندى جۇمىس جۇرگىزىپ جاتىر.