«ءۇمىتتىڭ» ءۇمىتىن ۇكىلەگەن

وسكەمەن قالاسىنىڭ ورەنى ەۆگەني ۆىبلوۆ «ح-Factor» جەڭىمپازى اتاندى

قازاقستاندىق تانىمال تەلە­­جوبالاردىڭ ءبىرى – «ح-Factor» بايقاۋىنىڭ جەڭىمپازى اتان­عان ەۆگەني ۆىبلوۆتى وسكەمەن­دىكتەر اۋەجايدان ۇلكەن قوشەمەت­پەن قارسى الدى. «ءۇمىت» بالالار ۇيىندە ءوسىپ, بۇكىل ەلدى قامتىعان مەگاجوبادا توپ جارعان جەنياعا دەگەن جەرلەستەرى مەن جانكۇيەرلەرىنىڭ ىستىق ىقىلاسى وسكەمەن اۋەجايىن شات-شادىمان كوڭىل كۇيگە بولەدى. – بارشاڭىزعا داۋىس بەرىپ, زور قولداۋ كورسەتكەندەرىڭىز ءۇشىن العىس ايتامىن. سىزدەردىڭ ۇمىتتەرىڭىز مەنى فينالعا جەتەلەپ الىپ شىقتى. بۇل – مەنىڭ ءان ونەرىندەگى العاشقى باسپالداعىم دەپ ويلايمىن, – دەدى ە.ۆىبلوۆ. ايتا كەتكەن ءلازىم, ەۆگەني 1990 جىلى 16 قازاندا وسكەمەن قالاسىندا دۇنيەگە كەلگەن. 9 جاسىنا دەيىن اجەسىنىڭ تاربيەسىندە بولعان ول 2000 جىلدان باستاپ «ءۇمىت» بالالار ۇيىندە ءتار­بيەلەندى. بالالار ۇيىندە ءجۇرىپ, ۆوكالعا دەن قويىپ, تۇراقتى تۇردە ونەرىن ورىستەتتى. وتكەن اپتانىڭ سەنبىسىندە فينالدىق باسەكەسى وتكەن جوبانى كۇللى قازاقستاندىقتار تاماشالادى. بايقاۋعا وسى ماۋ­سىمدا ءۇش مىڭنان استام ادام قاتىسىپ, ونەردەگى باعىن سىنادى. سولاردىڭ اراسىنان سۋىرىلىپ شىققان دارىندى جىگىت جوباعا دەيىن دە وسكەمەن جۇرتشىلىعىنا تانىس بولاتىن. جەنيا كوپتەگەن مەرەكەلەردە قالا الاڭدارى مەن ساحنالارىندا جەرگىلىكتى حالىقتىڭ قۇلاق قۇرىشىن قاندىرعان ساف داۋىسىمەن تاڭعالدىرعانى ەسى­مىزدە. ەندى ەۆگەنيدى ەلىمىزدىڭ باسقا وڭىرلەرى دە تانيدى. ول «ح-Factor» بايقاۋىنىڭ جەڭىمپازى اتاعىمەن بىرگە 5 ميلليون تەڭگە جانە «ەۋرازيا» ءبىرىنشى ارناسىندا جۇرگىزۋشى بولىپ جۇمىس ىستەۋ مۇمكىندىگىنە يە بولدى. دۋمان اناش, «ەگەمەن قازاقستان». وسكەمەن.