قىرۋار قارجى بولىنەدى, ال جولداردى جوندەۋ جۇمىسىنىڭ اياعى كورىنبەيدى. بۇل سالا تەك اقشا قۇيۋدى تالاپ ەتەدى. سەناتور بەكبولات ورىنبەكوۆ ءوزىنىڭ دەپۋتاتتىق ساۋالىندا جولداردى جوندەۋ ماسەلەسى ۇزاق جىلدار بويى شەشىلمەيتىنى تۋرالى ايتتى, دەپ حابارلايدى Egemen.kz.
دەپۋتات ەلىمىزدىڭ پرەزيدەنتى ۇكىمەتتىڭ كەڭەيتىلگەن وتىرىسىندا جوندەۋ جۇمىسى اياقتالمايتىن رەسپۋبليكالىق ماڭىزدى تراسسالار ماسەلەسىن تاعى دا كوتەرگەنىن ەسكە سالدى. 2017 جىلى باستالعان استانا – بالقاش – الماتى اۆتوجولىندا جوندەۋ جۇمىستارى ءالى اياقتالعان جوق. اتىراۋ – استراحان, اقتوبە – قاندىاعاش, تالدىقورعان – وسكەمەن سياقتى باسقا دا رەسپۋبليكالىق جولداردا جوندەۋ جۇمىستارى 5 جىلدان استام ۋاقىت بويى ءجۇرىپ جاتىر.
«پرەزيدەنت بۇعان دەيىن قاراعاندى وبلىسىنداعى جۇمىس ساپارىندا قاراعاندى – بالقاش جانە بالقاش – بۋرىلبايتال جولدارىنىڭ قۇرىلىسىن سىنعا الىپ, جۇمىستاردىڭ باياۋ ءجۇرىپ جاتقانىنا نازار اۋداردى. قاراعاندى وبلىسى ارقىلى قازاقستاننىڭ وڭتۇستىگى مەن سولتۇستىگىن جالعايتىن نەگىزگى ماگيسترال بولعاندىقتان, اۆتوجولداردىڭ ساپاسى ءوڭىردىڭ دامۋىنا ەرەكشە ىقپال ەتەتىنى ەسكە سالىندى. قاراعاندى-جەزقازعان تاس جولىنىڭ ماڭىزدىلىعىنا توقتالدى. ۇزىندىعى 500 شاقىرىمنان اساتىن بۇل جولدى جوندەۋ, ورتالىق اۋداندارمەن بايلانىستى جاقسارتۋعا جانە جۇك اعىنىن ۇلعايتۋعا مۇمكىندىك بەرىپ, ۇلىتاۋ وبلىسىنىڭ دامۋىنا وڭ اسەرىن تيگىزەدى. وسىلايشا, ەكى وبلىستىڭ ينۆەستيتسيالىق جانە تۋريستىك باعىتىنىڭ ۇلعاياتىنىنا ايرىقشا ءمان بەرىلدى», دەپ سەناتور ورىنبەكوۆ مەملەكەت باسشىسىنىڭ تاپسىرماسىن ەسكە سالدى.
دەپۋتاتتىڭ پىكىرىنشە, قازىر اۆتوجولداردى جوندەۋدى اياقتاۋ مەرزىمدەرىنىڭ ورىندالماۋ قاۋپى جوعارى. سونىمەن قاتار قازىر جاڭا ماگيسترالدار سالۋ جوسپارلارى ايتىلىپ جاتىر. دەپۋتات ەگەر بۇگىنگى كۇنى باستالعان جوبالاردى اياقتاۋعا قارجى بولماسا, وندا جاڭا جوبالار تۋرالى نە ايتۋعا بولادى, دەپ تاڭدانىسىن ءبىلدىردى.
«اتىراۋ – استراحان, اقتوبە – قاندىاعاش, كۇرتى-قاپشاعاي, قاراعاندى-بالقاش جوبالارى ءالى كۇنگە دەيىن ءتيىستى قارجىلاندىرۋمەن قامتاماسىز ەتىلمەگەنىنىڭ سەبەبى نەدە؟ ولاردى بيۋدجەت قاراجاتى ەسەبىنەن قوسىمشا قارىزدارسىز اياقتاۋعا مۇمكىندىك بار ما؟ وسى جوبالاردى اياقتاۋعا ەۋرازيالىق دامۋ بانكىنەن قارىز الۋ قانشالىقتى مۇمكىن؟ جاڭا قارىزداردى تارتۋ راسىمدەرى ۇزاققا سوزىلىپ, تولەم مەرزىمدەرى بۇزىلماي ما؟ نەمەسە قۇرىلىسقا تارتىلعان مەردىگەرلىك ۇيىمدار الدىنداعى مىندەتتەمەلەردىڭ ۋاقتىلى ورىندالۋىنا كەدەرگى بولماي ما؟ كولىك مينيسترلىگىنىڭ 12 مىڭ شاقىرىم جولىن قامتيتىن ۇزاق قۇرىلىستاردى اياقتاۋ جانە جاڭا جوبالاردى ىسكە اسىرۋ بويىنشا ناقتى قانداي جوسپار بار؟», دەپ بەكبولات ورىنبەكوۆ سۇراق قويدى.