سەمەيدە قۇرىلىس ماتەريالىن شىعاراتىن زاۋىتتا بەس جۇمىسشى جاراقات الدى, دەپ حابارلايدى Egemen.kz كتك تەلەارناسىنا سىلتەمە جاساپ.
جۇمىسشىلاردىڭ جاراقات الۋىنا سەرىكتەستىك ديرەكتورى كىنالى دەپ تانىلدى. سەبەبى جۇمىس بەرۋشى كاسىپورىنداعى قاۋىپسىزدىكتى قامتاماسىز ەتپەگەن.
ءبىر اي بۇرىن قۇرىلىس ماتەريالدارىن شىعاراتىن زاۋىتتا قۇبىر جارىلىپ, ىستىق سۋ اتقىلاعان. سول ساتتە جۇمىستا بولعان بەس ادام كۇيىپ قالماس ءۇشىن ەكىنشى قاباتتان سەكىرىپ كەتكەن. تەرەزەنى سىندىرىپ شىققانداردىڭ اياق-قولى سىنىپ اۋىر جارالانعان. ءتىپتى دارىگەرلەر اۋرۋحانا توسەگىنە تاڭىلعان ناۋقاستارعا بىرنەشە رەت وتا جاساعان. وسىدان كەيىن جابىرلەنۋشىلەردىڭ تۋىستارى وندىرىستە جاراقات العاندارعا باسشىلىق كومەك كورسەتپەدى دەپ نارازىلىق تانىتقان.
تەكسەرىس جۇرگىزگەن كوميسسيا سەرىكتەستىك ديرەكتورى «ولقىلىق جىبەرگەن» دەيدى. ياعني ىستىق سۋ قۇبىرلارىن جاڭارتقاندا ەشقانداي جوبا ازىرلەنبەگەن. ءتىپتى تەحنيكالىق ساپاسىنا دا ءمان بەرىلمەگەن كورىنەدى. ديرەكتور جاراقات العان جۇمىسشىلاردىڭ جالاقىسىمەن قاتار, بارلىق شىعىنىن تولەۋگە مىندەتتەلدى, قىلمىستىق جاۋاپقا دا تارتىلۋى دا مۇمكىن.
«بۇل جەردە ايىپپۇل قاراستىرىلماعان. سەبەبى قر قك 156-بابى بويىنشا ەڭبەك قورعاۋ سالاسىنداعى قاتەلىكتەرى ءۇشىن قىلمىستىق جاۋاپكەرشىلىك قاراستىرىلادى. ءبىز ماتەريالداردى قۇقىق قورعاۋ ورگاندارىنا جىبەردىك», دەدى اباي وبلىسى ەڭبەكتى قورعاۋ جانە قاۋىپسىزدىكتى باقىلاۋ ءبولىمىنىڭ باسشىسى توقتاربەك تۇسىپباەۆ.