بەينەۋلىكتەر سۋ تاسقىنىنان ەۆاكۋاتسيالانعان جىلىوي اۋدانى قۇلسارى قالاسىنىڭ تۇرعىندارىن ءوز ۇيلەرىنە ورنالاستىرىپ جاتىر. بۇل تۋرالى قوعامدىق كوممۋنيكاتسيا ورتالىعى حابارلادى.
كەڭ پەيىلدى جانداردىڭ قاتارىندا ىرىسبيكە ۋربيشەۆا دا بار. ول ۇيىنە 3 وتباسىنى كىرگىزىپ, اس-سۋ ۇسىنىپ, قاجەت دۇنيەلەرىن تاۋىپ بەرىپ وتىر.
«وسىنداي قيىن قىستاۋدا كومەك بەرۋ ازاماتتىق بورىشىمىز دەپ بىلەمىن. حالىق بولىپ قۇلسارى تۇرعىندارىنا جان-جاقتى جاعداي جاساۋعا نيەتتىمىز», دەدى ىرىسبيكە ۋربيشەۆا.
قۇلسارى قالاسىنىڭ حالقى جەرگىلىكتى تۇرعىندارعا العىستارىن جاۋدىردى.
«اۋىلىمىز تۇگەلدەي دەرلىك سۋ استىندا قالدى. سوعان بايلانىستى وسىنداي كومەك كورسەتىپ, بەينەۋگە كوشىردى. كەلگەن ءۇيىمىزدىڭ جاعدايى جاقسى. تاماعىمىز دايىن. ءوز ۇيىمىزدە دەمالىپ جاتقاندايمىز العىسىم شەكسىز!», دەدى جىلىوي اۋدانىنىڭ تۇرعىنى ابىلكاريم بىرەكەيەۆ.