رەسپۋبليكالىق «جاس تىلشىلەر» فورۋمىن وتكىزۋدى ءداستۇرلى ءىس-شاراعا اينالدىرعان ءال-فارابي اتىنداعى قازاق ۇلتتىق ۋنيۆەرسيتەتىنە بيىل دا ەلىمىزدىڭ تۇپكىر-تۇپكىرىنەن 60-تان استام تالاپكەر جينالدى.
بولاشاق جۋرناليستەردىڭ شىعارماشىلىعىن شىڭداپ, جولداما بەرەتىن «جاس تىلشىلەر» فورۋمىنىڭ شەجىرەسى تەرەڭدە جاتىر. العاش رەسپۋبليكالىق «جاس تىلشىلەر» سلەتى 1975 جىلى مامىر ايىندا وتكەن. ونىڭ باستاۋىندا و.سۇلەيمەنوۆ, ف.وڭعارسىنوۆا, د.ستامبەكوۆ, ش.سماحان ۇلى سىندى تانىمال اقىن-جازۋشىلار تۇرعانى بەلگىلى.
كەيىنگى جيىرما جىلدا جاڭا فورماتتا, زاماناۋي ۇلگىدە ءوتىپ جۇرگەن فورۋم بيىل دا بولاشاق جۋرناليستەر ءۇشىن جاڭا باعدارلامالارىمەن ەرەكشەلەندى. فورۋمنىڭ اشىلۋىندا جۋرناليستيكا فاكۋلتەتى ءباسپاسوز جانە ەلەكتروندى باق كافەدراسىنىڭ مەڭگەرۋشىسى, پروفەسسور گۇلميرا سۇلتانباەۆا مەن اعا وقىتۋشى سەرىك جۇمابەك ۇلى قوعامداعى ءجۋرناليستىڭ رولىنە توقتالدى.
«جاس تىلشىلەر» فورۋمى بارىسىندا گازەت ءتىلشىسىنىڭ جۇمىسى تۋرالى بەلگىلى قالامگەر-جۋرناليست جۇسىپبەك قورعاسبەك, تەلەۆيزياداعى قىر-سىرىنا جاڭىلحان اسىلبەكوۆا, جۋرناليستيكا نەگىزدەرى بويىنشا بەرىكبول تولەگەن شەبەرلىك سىنىپتارىن وتكىزدى.
فورۋم سوڭىندا ەڭ ۇزدىك شىعارماشىلىق جۇمىستار ماراپاتتالدى. «ەڭ ۇزدىك جاس ءتىلشى-2024» بايقاۋىنىڭ قورىتىندىسى بويىنشا باس جۇلدەگە «ۇلان» گازەتىنىڭ جاس ءتىلشىسى, سەمەي قالاسىنداعى №11 مەكتەپتىڭ وقۋشىسى ديانا اعزاموۆانىڭ جۇمىسى لايىق دەپ تانىلدى. فورۋم سوڭىندا ءال-فارابي اتىنداعى قازۇۋ جۋرناليستيكا فاكۋلتەتى جەڭىمپازدارعا سىيلىقتار تاپسىرىپ, ديپلومدارمەن ماراپاتتادى.
الماتى