سۋ تاسقىنى باستالعاننان بەرى ەل وڭىرلەرىندە ارميا بولىمشەلەرى جەرگىلىكتى تۇرعىنداردى قۇتقارۋعا, تجم جانە جەرگىلىكتى اتقارۋشى بيلىكتىڭ قۇتقارۋ قىزمەتتەرىنە كومەك كورسەتىپ جاتىر, دەپ حابارلايدى Egemen.kz قورعانىس مينيسترلىگىنىڭ مالىمەتىنە سىلتەمە جاساپ.
اۋە قورعانىسى كۇشتەرى مەن ۇشقىشتار دايارلايتىن اسكەري جوعارى وقۋ ورنىنىڭ ەكيپاجدارى جاپپاي سۋ باسقان اقتوبە ءوڭىرىنىڭ ەلدى مەكەندەرى مەن قىستاقتارىنان اۋىل تۇرعىندارىن ەۆاكۋاتسيالاۋدى جالعاستىرىپ جاتىر.
قاراعاندى وبلىسىنا قاراستى نۇرا اۋدانىنىڭ نۇرا, مىڭباەۆ, ەگىندى اۋىلدارىندا سۋ تاسقىنىنا قارسى شارالارعا «استانا» وڭىرلىك قولباسشىلىعى 31775, 44803, 55524 اسكەري بولىمدەرىنىڭ 144 اسكەري قىزمەتشىسى قوسىلدى. 8 بىرلىك ارنايى اۆتوكولىك تەحنيكاسى ءبولىندى. جەكە قۇرام سۇرىپتاۋ ستانتسياسى ماڭىنداعى سۋ قويماسىنىڭ جانە نۇرا وزەنىنىڭ بويىندا ورنالاسقان اۋىلداردىڭ اينالاسىنا قۇم سالىنعان قاپشىقتاردى توسەپ, ءۇيىندى جاساپ جاتىر.
اقمولا وبلىسىنىڭ اقكول قالاسىندا 55209 اسكەري ءبولىمىنىڭ اسكەري قىزمەتشىلەرى 1000 مەترگە جۋىق اعىن سۋ كارىزىن تازارتتى.
27 ناۋرىزدان 1 ساۋىرگە دەيىن اسكەري ۇشقىشتار بارلىعى 1851 ادامدى ەۆاكۋاتسيالادى, ونىڭ 557-ءسى بالا, 30 توننادان استام گۋمانيتارلىق جۇك جەتكىزىلدى.
ودان وزگە 17 مىڭعا جۋىق قاپشىق دايىندالىپ, توسەلدى. 200 توننا قۇم جەتكىزۋ ءۇشىن ماشينالار 97 رەيس جاسادى. 1400 مەترگە جۋىق اعىن سۋ كارىزى تازارتىلدى.
سۋ تاسقىنىنا قارسى شارالار ءالى جالعاسىپ جاتىر. قارۋلى كۇشتەردىڭ كۇش-قۇرالدارى جەرگىلىكتى حالىققا كومەك كورسەتۋ جونىندەگى مىندەتتەردى ورىنداۋعا قاشاندا دايىن ەكەنى ءمالىم بولدى.