بوكستان قازاقستان ايەلدەر قۇراماسىنىڭ باس باپكەرى بولىپ سايدالين ەلدوس جانىبەك ۇلى تاعايىندالدى, دەپ جازادى Egemen.kz.
ەلدوس جانىبەك ۇلىنىڭ باپكەرلىك ەڭبەك ءوتىلى 16 جىلدان اسادى.
ول قاراعاندى وبلىسى بالالار مەن جاسوسپىرىمدەردىڭ مامانداندىرىلعان سپورت مەكتەبىندە جاتتىقتىرۋشى بولعان.
«2020 جىلدان بەرى ايەلدەر بوكسىنان قازاقستان جاستار جانە جاسوسپىرىمدەر قۇرامالارىنىڭ اعا باپكەرى. ونىڭ جەتەكشىلىگىمەن 2021 جىلعى الەم چەمپيوناتىندا قىزدارىمىز 2 كۇمىس, 3 قولا مەدال ەنشىلەگەن. 2022 جىلى الەم چەمپيوناتىندا جاستار قۇراماسى 2 التىن, 2 كۇمىس, 3 قولا مەدال جەڭىپ الدى. ال 2023 جىلى استانادا وتكەن جاستار جانە جاسوسپىرىمدەر اراسىنداعى ازيا چەمپيوناتىندا قازاقستان قىزدارى ەل قورجىنىنا 8 التىن, 4 كۇمىس جانە 9 قولا مەدال سالدى. سونداي-اق بىلتىر ارمەنيادا وتكەن جاسوسپىرىمدەر اراسىنداعى دۇنيەجۇزىلىك دودادا 3 التىن, 5 قولا مەدال جەڭىپ الدى», دەلىنگەن قازاقستان بوكس فەدەراتسياسى تاراتقان حابارلامادا.