مەملەكەتتىك باسقارۋ اكادەمياسى جاڭا وقۋ جىلىنا قابىلداۋدى باستادى

وقۋعا قۇجاتتاردى قابىلداۋ ونلاين فورماتتا اكادەميانىڭ ارنايى اقپاراتتىق جۇيەسى ارقىلى 1 ساۋىردەن 26 ماۋسىمعا دەيىن جالعاسادى. سپيكەردىڭ ايتۋىنشا, بيىل وقۋعا قابىلداۋ ەرەجەلەرىندە بىرقاتار وزگەرىس بار.

«حالىقارالىق قاتىناستار», «مەملەكەتتىك ساياسات» جانە «ەكونوميكا» ەكى جىلدىق باعدارلامالارى بويىنشا وقۋ مەرزىمى ەكى جىلدان ءبىر جارىم جىلعا دەيىن قىسقارتىلدى. بيىل «مەملەكەتتىك باسقارۋ» باعدارلاماسىنا قۇقىق قورعاۋ ورگاندارىنان جانە ارنايى مەملەكەتتىك ورگانداردان دا ۇمىتكەرلەردى قابىلدايمىز. قابىلداۋ ناۋقانىنىڭ جالپى مەرزىمى 20 كۇنگە قىسقارتىلدى. قورىتىندى اقپاراتتى بيىل 5 تامىزدا جاريالاۋدى جوسپارلاپ وتىرمىز. سونىمەن قاتار ماگيستراتۋرا باعدارلامالارى ءۇشىن سۇحبات كەزەڭىن باعالاۋدىڭ ۇلەس سالماعى 70%-عا دەيىن جانە دوكتورانتۋرا ءۇشىن 50%-عا دەيىن كوتەرىلدى», دەدى اكادەميا رەكتورى.

ماگيسترلىك ءبىلىم بەرۋ باعدارلامالارى بويىنشا مەملەكەتتىك تاپسىرىسپەن وقۋعا ءتۇسۋ ءۇشىن مەملەكەتتىك قىزمەتتە كەمىندە 2 جىل, ال دوكتورلىق باعدارلامالار ءۇشىن 5 جىل ەڭبەك ءوتىلى بولۋى قاجەت.

«اكادەميادا مەملەكەتتىك قىزمەتشىلەردى دايارلاۋ 8 ماگيستراتۋرا باعدارلاماسى جانە 3 دوكتورانتۋرا باعدارلاماسى بويىنشا جۇزەگە اسىرىلادى. سونداي-اق مەملەكەتتىك قىزمەتشى ەمەس تۇلعالارعا نەگىزگى جۇمىسىمەن قاتار وقۋعا بولاتىن 2 مودۋلدىك باعدارلاما قاراستىرىلعان. مەملەكەتتىك قىزمەتشىلەردى دايارلاۋعا ماگيستراتۋرا بويىنشا 120 گرانت, دوكتورانتۋرا بويىنشا 12 گرانت بولىنگەن. گرانتقا تاپسىرۋشىلار مەملەكەتتىك ورگاننىڭ جولداماسىن ۇسىنۋى قاجەت. وعان مەملەكەتتىك ورگان باسشىسى نەمەسە اپپارات باسشىسى قول قويۋى كەرەك. شەتەلدىك ازاماتتاردى ەسەپتەمەگەندە, بارلىق ءبىلىم بەرۋ باعدارلامالارىنا تۇسۋشىلەردىڭ مەملەكەتتىك ءتىلدى مەڭگەرۋى ۆ1 دەڭگەيىنەن تومەن ەمەس ەكەنىن راستايتىن QAZAQ RESMI TEST نەمەسە قازتەست سەرتيفيكاتى بولۋى ءتيىس», دەپ اتاپ ءوتتى ەرلان قۋانىش ۇلى.

سپيكەردىڭ مالىمەتىنشە, ىرىكتەۋدىڭ العاشقى كەزەڭى – اناليتيكالىق ەسسە جازۋ 29 ماۋسىمدا ناقتى ۋاقىت رەجيمىندە وتەدى. دوكتورانتۋراعا ۇمىتكەرلەر زەرتتەۋ جۇمىسىنىڭ جوسپارىن (Research proposal) 26 ماۋسىمعا دەيىن جۇكتەۋى كەرەك, جوسپارلار 7 شىلدەگە دەيىن باعالانادى. قورىتىندى كەزەڭ – سۇحبات – 1-20 شىلدە ارالىعىندا اكادەميا قابىرعاسىندا وفلاين فورماتتا وتەدى. 22 شىلدە كۇنى ارالىق قورىتىندى شىعارىلادى.