قازاقستاننىڭ بۇرىنعى ۇلتتىق ەكونوميكا ءمينيسترى الىبەك قۋانتىروۆ «Kazenergy» مۇناي-گاز جانە ەنەرگەتيكالىق كەشەن ۇيىمدارى قاۋىمداستىعىنىڭ باس ديرەكتورى بولىپ تاعايىندالدى, دەپ حابارلايدى Egemen.kz.
اقپاراتتى بۇگىن «Kazenergy» كومپانياسىنىڭ ءباسپاسوز قىزمەتى راستادى.
ايتا كەتەيىك, 2021 جىلدىڭ ءساۋىر ايىنان باستاپ «Kazenergy» قاۋىمداستىعىنىڭ باس ديرەكتورى كەنجەبەك يبراشەۆ بولدى.
الىبەك قۋانتىروۆ 1983 جىلى 14 قاراشادا اتىراۋ قالاسى 2006 جىلى تومسك مەملەكەتتىك ۋنيۆەرسيتەتىن (قارجى جانە نەسيە, لينگۆيستيكا جانە مادەنيەتارالىق كوممۋنيكاتسيا ماماندىعى), 2010 جىلى «بولاشاق» ستيپەندياسى بويىنشا ميچيگان ۋنيۆەرسيتەتىن (قولدانبالى ەكونوميكا ماگيسترى) بىتىرگەن. پرەزيدەنتتىك جاستار كادر رەزەرۆىنىڭ مۇشەسى.
ەڭبەك جولىن 2005 جىلدىڭ قىركۇيەگىندە قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگى حالىقارالىق بايلانىستار دەپارتامەنتىنىڭ ىشكى باسقارۋ دەپارتامەنتىنىڭ جەتەكشى مامانى بولىپ باستاپ, 2006 جىلدىڭ اقپان ايىنا دەيىن جۇمىس ىستەدى. ودان كەيىن 2022 جىلدىڭ قاڭتارىنا دەيىن قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىندە, قازاقستان رەسپۋبليكاسى ەكونوميكالىق دامۋ جانە ساۋدا مينيسترلىگىندە, قازاقستان رەسپۋبليكاسى قارجى مينيسترلىگىندە ءتۇرلى لاۋازىمداردى اتقارعان. ول سونداي-اق قازاقستان رەسپۋبليكاسى ۇلتتىق ەكونوميكا ۆيتسە-ءمينيسترى بولدى (02.2021-11.01.2022).
2022 جىلعى قاڭتاردان 2024 جىلعى اقپانعا دەيىن قازاقستان رەسپۋبليكاسىنىڭ ۇلتتىق ەكونوميكا ءمينيسترى قىزمەتىن اتقاردى.