ەكس-مينيستر قۋاندىق بيشىمباەۆتىڭ كەزەكتى سوت وتىرىسىندا پروكۋرور الەۋمەتتىك جەلىدە سوتقا قاتىستى جاريالانىمداردى شەكتەۋدى تالاپ ەتتى, دەپ حابارلايدى Egemen.kz.
سوت وتىرىسىندا بيشىمباەۆقا ءسوز بەرىلدى. ايىپتالۋشى ءوز ءسوزىن وسى قايعىلى جاعدايدا اسا قاتىگەزدىكپەن كىسى ولتىرمەگەنىن, ونداي ويى بولماعانىن, سول ءۇشىن كىناسىن مويىندامايتىنىنان باستادى.
سونداي-اق بيشىمباەۆ مارقۇم ايەلىنىڭ تۋىسقاندارىنا كىنا ارتىپ وتىر. ايتۋىنشا, نۇكەنوۆانىڭ اعاسى مەن تۋىستارى الەۋمەتتىك جەلىلەر مەن باق بەتتەرىندە 5 اي بويى وزىنە قاتىستى جالعان اقپاراتتار تاراتىپ, قۋاندىق بيشىمباەۆتى جامان كورسەتۋ ءۇشىن جۇمىس ىستەگەن.
«سالتاناتتىڭ دەنەسىندە ساۋ جەرى جوق, ءبىر كوزى اعىپ كەتكەن دەگەن اقپاراتتار تارادى. بىراق نەگىزى ولاي بولعان جوق. ول شىندىققا جاناسپايدى. ال ماعان وسىنىڭ ءبارىن تۇسىندىرۋگە مۇمكىندىك بەرىلگەن جوق», دەپ اعىنان جارىلدى ايەلىن ءولتىردى دەپ ايىپتالىپ وتىرعان بۇرىنعى مينيستر.