ايەلىن اسا قاتىگەزدىكپەن ءولتىردى دەپ ايىپتالعان ەكس-مينيستر قۋاندىق بيشىمباەۆتىڭ كەزەكتى سوت وتىرىسى ءوتىپ جاتىر. سوت وتىرىسىنا كۋاگەر شاقىرىلىپ قوسىمشا سۇراقتار قويىلدى. كۋاگەر ءابىل عالىم ۇلىنىڭ جاۋاپتارى تەرگەۋ كەزىندەگى ايعاقتارمەن سايكەس كەلمەيدى, دەپ حابارلايدى Egemen.kz.
سوت پروتسەسى كەزىندە پروكۋرور ءابىل عالىم ۇلىنا بىرنەشە سۇراق قويدى. كۋاگەر كەي سۇراقتاردان ءمۇدىرىپ قالدى. پروكۋرور ونىڭ تەرگەۋ كەزىندە ايتقان سوزدەرىن سوت وتىرىسىندا وقىپ بەردى.
«2023 جىلى 8 قاراشا كۇنى مەن ادەتتەگىدەي ق.بيشىمباەۆتىڭ ۇيىندە بولدىم. پاتەردە مەنىمەن بىرگە جۇمىسشىلار بولعان ەدى. كەشكى ساعات 18:00-دەرگە قاراي قۋاندىق پەن سالتاناتتىڭ ۇيدەن شىعىپ بارا جاتقانىن ەستىدىم. بىراق مەن ولاردى كورمەدىم. كەيىنىرەك شامامەن ساعات 21:00-دە سالتانات نۇكەنوۆادان ءۇيدىڭ كىلتى قايدا تۇرعانىن سۇراپ حابارلاستىم. سول ساتتە سالتانات كونتسەرتتە ەكەن. ول كىلتتىڭ ءورت قالقانىنىڭ ىشىندە تۇرعانىن ايتتى. سوسىن ءبىز جۇمىسشىلارمەن بىرگە ۇيدەن شىعىپ كەتتىك», دەپ پروكۋرور ءابىل عالىم ۇلىنىڭ تەرگەۋ كەزىندەگى ءسوزىن وقىپ بەردى.
ال سوت وتىرىسى كەزىندە كۋاگەر مۇلدەم باسقاشا جاۋاپ بەردى. اتاپ ايتقاندا, ول 8 قاراشا كۇنى قۋاندىق پەن سالتاناتتى كورگەنىن, نۇكەنوۆاعا قوڭىراۋ شالماعانىن, كىلتتىڭ قايدا تۇرعانىن بايجانوۆتان سۇراپ-بىلگەنىن ايتتى. پروكۋرور ونىڭ تەرگەۋدەگى ايعاقتارىن كەلتىرگەندە ول قوبالجىپ تۇرعانىن, وقيعا بارىسىن ەسىنە دۇرىس تۇسىرە الماي تۇرعانىن جەتكىزدى.
سوت وتىرىسىنىڭ تىكەلەي كورسەتىلىمىن مىنا سىلتەمە ارقىلى كورۋگە بولادى.