ەكس-مينيستر قۋاندىق بيشىمباەۆتىڭ كەزەكتى سوت وتىرىسىندا پروكۋرور الەۋمەتتىك جەلىدە سوتقا قاتىستى جاريالانىمداردى شەكتەۋدى تالاپ ەتتى, دەپ حابارلايدى Egemen.kz.
القابيلەردى سوت زالىنا شاقىرماس بۇرىن پروكۋرور ۇسىنىس جاريالادى. مەملەكەتتىك ايىپتاۋشى اتاپ وتكەندەي, سوت تاراپتاردىڭ باسەكەلەسۋى ءۇشىن بارلىق جاعدايدى جاساعان. اتاپ ايتقاندا, سوت زالىندا فوتوعا تۇسىرۋگە جانە دىبىس جانە بەينە جازبالاردى پايدالانۋعا رۇقسات ەتىلەدى. الايدا بۇل ارەكەتتەر سوت تالقىلاۋىنىڭ قالىپتى وتۋىنە كەدەرگى بولماۋى كەرەك.
پروكۋروردىڭ ايتۋىنشا, 29 ناۋرىزداعى سوت وتىرىسىنان كەيىن الەۋمەتتىك جەلىلەردە سوت وتىرىسىنىڭ وتۋىنە قاتىستى جەكە پىكىرلەرىن بىلدىرەتىن جازبالار جاريالانعان. بۇل سوتقا قىسىم جاسايدى.
«بۇل ءمان-جايلار سوت تالقىلاۋىنىڭ قالىپتى وتۋىنە كەدەرگى كەلتىرەدى جانە القابيلەرگە كەرى اسەرىن تيگىزەدى. قۇرمەتتى سوت, پروتسەسكە بارلىق قاتىسۋشىلاردى قىلمىستىق ءىس جۇرگىزۋ زاڭناماسىنىڭ تالاپتارىن ساقتاۋعا مىندەتتەۋىڭىزدى جانە وسى ماسەلە بويىنشا ءوز پىكىرلەرىن ءبىلدىرۋدى سۇرايمىن. پروتسەسكە قاتىسۋشىلاردىڭ قارسىلىقتارى, مالىمدەمەلەرى بويىنشا سوت تالقىلاۋى الەۋمەتتىك جەلىدە ەمەس, سوت ءىسىن جۇرگىزۋ اياسىندا بولسىن», دەدى پروكۋرور.
سوت وتىرىسىنا قاتىسۋشىلاردىڭ بارلىعىنىڭ كەلىسىمىمەن سوت ءتورايىمى ءوتىنىشتى قاناعاتتاندىردى. ول بارلىق قاتىسۋشىلارعا الەۋمەتتىك جەلىدە ءسوز سويلەۋدەن باس تارتۋعا كەڭەس بەردى, سەبەبى بۇل القابيلەر اراسىندا تەرىس پىكىر تۋدىرىپ, قىلمىستىق ءىستى وبەكتيۆتى قاراۋعا كەدەرگى كەلتىرۋى مۇمكىن.
ەسكە سالا كەتەيىك, استانادا ايەلى سالتانات نۇكەنوۆانى ءولتىردى دەپ ايىپتالعان بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ سوتى ءوتىپ جاتىر. سوتتىڭ تىكەلەي كورسەتىلىمىن مىنا سىلتەمە ارقىلى كورە الاسىزدار.