بيشىمباەۆ ءىسى: بەينەجازبالاردى وشىرگەن قىزمەتكەر سوتتا كۋالىك ەتتى

سوتتا گاسترو ورتالىقتىڭ جالعا بەرۋ ءبولىمىنىڭ باسشىسى قالمۇرات مولداقاش كۋالىك ەتتى. ول ءوز سوزىندە ءىس بويىنشا ەكىنشى كۇدىكتى باقىتجان بايجان گاسترو ورتالىقتاعى بەينەكامەرالارعا تۇسكەن جازبالاردى ءوشىرۋدى سۇراعانىن راستادى.

«سول كۇنى ساعات 13:00-دە ورتالىقتىڭ ءبىرىنشى قاباتىندا بارلىعى جۇمىس ىستەپ تۇرعان. بىراق 2-ءشى قاباتتا ەشكىم بولعان جوق. سوندا مەن اكىمشى گۇلزادا يسمايلوۆاعا بارىپ, رەستوراننىڭ نەگە اشىلماعانىن سۇراستىردىم. ول «باۋ» رەستورانىندا سانيتارلىق كۇن دەپ قىسقا قايىردى. ءبىر ساعاتتان كەيىن, ياعني, 14:00-دە گۇلزادا يسمايلوۆا كابينەتكە كەلىپ: «باقىتجان بايجان حابارلاستى, گاسترو ورتالىقتاعى بەينەكامەرالارعا تۇسكەن جازبالاردى ءوشىرۋ كەرەك», دەدى. كەيىن باقىتجان بايجاننىڭ ءوزى كابينەتكە كەلىپ, وعان كومەكتەسۋدى سۇرادى», دەدى كۋاگەر.

ونىڭ ايتۋىنشا, وقيعا بولعان كۇنى ورتالىق باسشىسى مەن اكىمشى وزدەرىن وتە بايسالدى ۇستاعان. سونداي-اق گاسترو ورتالىقتا جۇيەلىك ادمينيستراتورلار جۇمىس ىستەمەيدى.

ء«بىز ديسپەتچەرلىك كابينەتتىڭ كىلتىن الدىق. باقىتجان بايجان گۇلزادا يسمايلوۆاعا بارلىق بەينەجازبانى ءوشىرۋدى تاپسىرعان. سول كەزدە بەينەجازبالاردى بىرتىندەپ وشىرە باستادىم. بارلىق ماتەريالداردى 15 مينۋتتىڭ ىشىندە ءوشىرىپ تاستادىم. قاسىمدا گۇلزادا بولدى, كەيىن باقىتجان بايجاننىڭ ءوزى دە كەلدى. تاپسىرمانى ورىنداپ بولعان سوڭ كابينەتتى كىلتتەپ, ءوز جۇمىسىما قايتا ورالدىم», دەدى قالمۇرات مولداقاش.

(ۆيدەودان الىنعان كادر)

وسى تۇستا كۋاگەر بەينەجازباعا تۇسكەن كادرلاردى كورەمەگەنىن العا تارتتى. باسشىلىق بۇعان دەيىن وسىعان ۇقساس تاپسىرما بەرىپ كورمەگەن, سوندىقتان بەينەجازبانى ءوشىرۋ سەبەبىن دە سۇراماعانىن ايتتى. 

كەيىن, ساعات 16:00-دە باقىتجان بايجان قالمۇرات مولداقاشتان ءمۇساتىر ءسپيرتىن اكەلۋدى وتىنگەن. بىراق نە ءۇشىن كەرەك ەكەنىن تۇسىندىرمەدى. 

«باقىتجان بايجان شۇعىل تۇردە سپير اكەلۋىمدى سۇرادى, مەن ورتالىق جانىنداعى ساۋدا ورتالىعىنا بارىپ, سۇراعان زاتىن الىپ كەلدىم. ءسپيرتتىڭ نە ءۇشىن كەرەگىن سۇرامادىم», دەپ سەندىردى كۋاگەر.

كۋاگەر كىسى ءولىمى تۋرالى تەك 20:00-گە قاراي بىلگەنىن ايتتى.

«20:00-گە قاراي اكىمشى گۇلزادا حابارلاسىپ, ورتالىقتا توتەنشە جاعداي بولعانىن جاريالادى. سول كەزدە ءبىز باسقا ءىس-شارادا وتىرعان ەدىك. ول عيمارات اينالاسىندا پوليتسيا قىزمەتكەرلەرى قاپتاپ كەتكەنىن ايتتى. 2-قاباتتا كىسى ءولىمى بولعانىن سول كەزدە بىلدىك», دەپ ءتۇسىندىردى قالمۇرات مولداقاش.