جەتىسۋ وبلىسىندا داقىلداردىڭ ەگىس القابى ۇلعايتىلادى

وبلىستىق اۋىل شارۋاشىلىعى باسقارماسىنىڭ مالىمەتىنە سۇيەنسەك, بۇگىنگى كۇندە ىلعال جابۋ, تىرمالاۋ, سەبۋ جۇمىستارى جۇرگىزىلىپ جاتىر. بيىلعى ونىمگە قاجەتتى 57,7 مىڭ توننا جازدىق داقىلدار تۇقىمى دايارلانىپ, ساپاسى زەرتحانالىق تەكسەرۋدەن وتكىزىلىپ جاتىر. وسى جىلعا 11,5 مىڭ گەكتار قانت قىزىلشاسىن سەبۋ جوسپارلانسا, وعان قاجەتتى 16,1 مىڭ سەبۋ بىرلىگى كولەمىندەگى تۇقىم تولىعىمەن قامتاماسىز ەتىلەدى, سونىڭ ىشىندە 9,6 مىڭ سەبۋ بىرلىگى كوكسۋ قانت زاۋىتىندا, 6,1 مىڭ سەبۋ بىرلىگى «جەتىسۋ» اكك-دە قاراستىرىلعان.

«قازىرگى كەزدە 444 شارۋاشىلىق 10,7 مىڭ توننا مينەرالدى تىڭايتقىش ساتىپ الدى. سونداي-اق قويمالاردا 3 049 توننا مينەرالدى تىڭايتقىش بار. كوكتەمگى دالا جۇمىستارىنا 4124 توننا ديزەل وتىنى ءبولىندى, ونىڭ ءبىر ءليترىنىڭ باعاسى - 250 تەڭگە. كوكتەمگى دالا جۇمىستارىنا تارتىلاتىن 23 مىڭ بىرلىك تەحنيكانىڭ دايىندىق دەڭگەيى - 99%. سول سياقتى بيىل قانت قىزىلشاسىن وسىرۋگە باعىتتالعان 8 سەرۆيستىك-دايارلاۋ ورتالىعى قۇرىلدى. جەرگىلىكتى بيۋدجەتتەن بولىنگەن 2,5 ملرد تەڭگەگە سەپكىش, جاپىراق جيناعىش, كومباين سياقتى 62 بىرلىك جاڭا اۋىل شارۋاشىلىعى تەحنيكالارى الىنىپ جاتىر. بۇدان بولەك, «قازاگروقارجى» فيليالىنا 2,2 ملرد.تەڭگەگە 106 ءوتىنىم ءتۇسىپ, 70 شارۋاشىلىققا 1,4 ملرد.تەڭگەگە 131 بىرلىك اۋىل شارۋاشىلىعى تەحنيكاسى الىندى. وعان قوسا كوكتەمگى دالا جۇمىستارىنا «اگرارلىق نەسيە كورپوراتسياسى» 61 شارۋاشىلىققا 948 ملن تەڭگە نەسيە بەردى», دەلىنگەن جەتىسۋ وبلىستىق اۋىل شارۋاشىلىعى باسقارمانىڭ حابارلاماسىندا.

بەكىتىلگەن ليميتكە سايكەس وسى جىلدىڭ ۆەگەتاتسيالىق كەزەڭىنە 1,3 ملرد تەكشە مەتر سۋ بەرۋ جوسپارلانعان. قازىرگى كەزدە سۋ قويمالارىنا سۋ جيناۋ جۇمىستارى جالعاسىپ جاتىر, ورتاشا تولىمدىلىعى - 76%.  ۆەگەتاتسيالىق كەزەڭىنە 208,7 كيلومەتر سۋ ارنالارى تازارتىلدى, جىل سوڭىنا دەيىن قوسىمشا 274,8 كيلومەتر ارنالار تازارتىلادى.

جالپى كوكتەمگى دالا جۇمىستارى جوسپارعا سايكەس جۇرگىزىلىپ جاتىر, ونىڭ بارىسى تۇراقتى باقىلاۋعا الىندى.