اباي وبلىسىنا قاراستى اياگوز اۋدانىندا سۋدا جوعالىپ كەتكەن ءۇش ەر ادامدى ىزدەۋ جۇمىستارىنا وبلىستىق تجد, پوليتسيا دەپارتامەنتى, جاو, قم كۇشتەرى مەن قۇرالدارىنان بارلىعى 82 ادام, 4 ءجۇزۋ قۇرالى, 9 بىرلىك تەحنيكا, 4 پيلوتسىز ۇشۋ اپپاراتى, سونداي-اق جەرگىلىكتى تۇرعىنداردان ازاماتتار جۇمىلدىرىلعان, دەپ حابارلايدى Egemen.kz.
اتالعان وبلىس اكىمدىگىنىڭ ءباسپاسوز قىزمەتىنىڭ ءمالىم ەتۋىنشە, 23 ناۋرىزدان بەرى 1977 جىلعى ەر ادام ىزدەستىرىلىپ جاتىر. ول ءوزى جۇمىس اتقاراتىن «شىعىس» شارۋا قوجالىعىنا بارار جولدا اياگوز وزەنىنەن وتپەكشى بولعان كەزدە, اتتان قۇلاپ, سۋعا كەتكەن دەپ بولجانىپ وتىر. سونىمەن قاتار 26 ناۋرىزدان باستاپ 1957 جانە 1985 جىلى تۋعان تاعى ەكى ازاماتتى ىزدەستىرۋ جۇرگىزىلىپ جاتىر. ولار «شالقار» قوسالقى شارۋاشىلىعىنان قاراعاش اۋىلىنا قاراي جولعا شىققان «متز 82» ماركالى تراكتوردا بورلى وزەنىنەن ءوتۋ كەزىندە سۋدا جوعالىپ كەتكەن. جولدى قىسقارتۋ ءۇشىن وزەننەن وتپەكشى بولعانىمەن ورتاسىندا تۇرىپ قالعان. وقيعا ورنىنا كەلگەن قۇتقارۋشىلار ادامداردى تاپپاعان.
كوكتەمگى لاستانۋعا بايلانىستى ايدىنداردىڭ سۋ استى كورىنۋىنىڭ ناشارلىعىنان جانە سۋ اعىنىنىڭ جوعارى جىلدامدىعىنان سۇڭگۋىرلەردىڭ جۇمىسى كۇردەلەنىپ وتىر.
18 ساعات 26 مينۋتتا سەمەي قالاسىنىڭ قم مي-17 تىكۇشاعى بورلى وزەنى بويىن اەروۆيزۋالدى قاراۋعا اۋەگە ۇشقانىمەن اۋماقتى زەرتتەۋ ناتيجە بەرمەگەن.
ىزدەۋ-قۇتقارۋ جۇمىستارى قاراڭعى تۇسۋىنە بايلانىستى ۋاقىتشا توقتاتىلدى. 26 ناۋرىزدا دا قاراڭعى تۇسۋىنە بايلانىستى توقتاتىلعان بولاتىن.
28 ناۋرىز كۇنى تاڭعى ساعات 6-دان باستاپ ىزدەۋ جۇمىستارىن قايتا باستاۋ جوسپارلانىپ وتىر.