استانا ىرگەسىندە ورنالاسقان قوياندى اۋىلىندا قار سۋى ەرىپ, بىرنەشە اۋلانى سۋ باسقان. ءجۇرىپ-تۇرۋ قيىنداعان اۋىل تۇرعىندارى ايماقتا توتەنشە جاعداي جاريالاۋدى تالاپ ەتىپ, 26 ناۋرىز كۇنى, كەشكە كۇرە جولدى جاۋىپ تاستادى, دەپ جازادى Egemen.kz ازاتتىق راديوسىنا سىلتەمە جاساپ.
تۇرعىندار, اۋەلى, ماسەلەسىن ايتىپ تسەلينوگراد اۋدانىنىڭ اكىمى باقىتبەك وسپانبەكوۆكە جۇگىنگەن.
تالابى ورىندالماعان قوياندىلىقتار كۇرە جولدى جاۋىپ تاستادى. ولار, ءتىپتى, اۋدان اكىمىنە توتەنشە جاعداي جاريالانباي, تالاپ-تىلەگى ورىندالماعان جاعدايدا جولدى جاۋىپ تاستايتىندارىن دا ەسكەرتىپتى.
دەرەككوز جاريالاعان بەينەجازبادا اۋىل تۇرعىندارىنىڭ: «قوياندىعا جاعداي جاسالسىن. قىس ءبىتىپ, كۇن رايى جىلىعاندا جىل سايىن بالشىققا باتىپ قالامىز. جۇمىسىن ورىنداي الماعاندار لاۋازىمىن بوساتسىن», دەگەن سوزدەرىن ەستۋگە بولادى.
قوياندىلىقتار ۋاكىلەتتى ورىنداردىڭ اۋىلدى قارعىن سۋ باسىپ قالۋ ماسەلەسىن جىلى-جۇمساق جەتكىزىپ جاتقاندارىنا دا نارازى.
«26 ناۋرىز. بۇكىل حالىق اكىمدىك الدىنا جينالدىق. ءبىزدىڭ تالاپ – جەرگىلىكتى جەردە توتەنشە جاعداي ەنگىزۋ. اۋىلىمىز سۋ استىندا قالدى. سۋ نەشە ۇيگە كىردى؟ ولار وتەماقىنى قالاي وتەيتىنىن ايتپايدى. كولىك كەرەك, كومەك كەرەك, سۋدى سورعىزاتىن ادامدار كەرەك. قىس بويى قاردى تازالاماۋدىڭ سالدارىن بۇگىن كورىپ وتىرمىز», دەدى اۋىل تۇرعىنى.
توتەنشە جاعدايلار مينيسترلىگى قوياندى اۋىلىنداعى قارعىن سۋ باسقان اۋماقتىڭ ماسشتابىن ناقتى جاريالامادى. دەگەنمەن 27 ناۋرىز تاڭعى ساعات 6 شاماسىندا 80 مىڭ تەكشە مەتر ەرىگەن سۋ تارتىلعانىن حابارلادى.
«اقمولا وبلىسى مەن استانا قالاسى تجد جانە جاو 17 تەحنيكاسى, 76 ادامى جانە 18 موتوپومپاسى جۇمىلدىرىلدى. جاعداي قالىپتى», دەدى اقمولا وبلىسى تجد باستىعى قانات دوسپاەۆ.