مەملەكەت باسشىسى قاسىم-جومارت توقاەۆ قحر شىڭجاڭ-ۇيعىر اۆتونوميالىق اۋدانى قكپ پارتيا كوميتەتى حاتشىسىنىڭ ورىنباسارى, شۇاا حالىق ۇكىمەتىنىڭ توراعاسى ەركين تۋنيازدى قابىلدادى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
«مەن جۋىردا ۇرىمجىگە باردىم. جالپى قازاقستاننىڭ قىتايمەن, سونىڭ ىشىندە شىڭجاڭ پروۆينتسياسىمەن اراداعى ىنتىماقتاستىعىن دامىتۋ پەرسپەكتيۆالارىنا بايلانىستى ماڭىزدى كەلىسسوزدەر جۇرگىزدىك. ءبىز قىتايدىڭ ەكونوميكالىق ءوسىمىن ءجىتى باقىلاپ وتىرمىز جانە بۇل باعىتتاعى قارقىندى دامۋى مەن قول جەتكىزگەن ناتيجەلەرىنە باسا ءمان بەرەمىز. قىتاي – ەكونوميكالىق دامۋ تۇرعىسىنان الەمدەگى باستى ەلدەردىڭ ءبىرى. سوندىقتان ءبىز سياقتى كورشى مەملەكەتكە ىنتىماقتاستىقتى ىلگەرىلەتۋ ءتيىمدى ءارى قاجەت. قازاقستانعا كەلەر بولساق, وسى ىقپالداستىقتى تابىستى دامىتۋ ءۇشىن قولدان كەلگەننىڭ ءبارىن جاسايمىز», دەدى پرەزيدەنت.
مەملەكەت باسشىسى ەلىمىزدىڭ شىڭجاڭمەن ساۋدا, ونەركاسىپ, كولىك, لوگيستيكا, اۋىل شارۋاشىلىعى جانە تۋريزم سياقتى كوپتەگەن سالا بويىنشا تابىستى قارىم-قاتىناس ورناتقانىن اتاپ ءوتتى. قاسىم-جومارت توقاەۆتىڭ ايتۋىنشا, بۇل ولكە قازاقستاننىڭ قحر-مەن سان قىرلى بايلانىسىن نىعايتۋدا ستراتەگيالىق ءرول اتقارادى.
ءوز كەزەگىندە ەركين تۋنياز قوناقجايلىق تانىتقانى ءۇشىن قاسىم-جومارت توقاەۆقا العىس ايتتى.
- ء«ۇش ز ۇلىم كۇشكە» قارسى كۇرەسكە جانە وسى ايماقتاعى تۇراقتىلىقتى ساقتاۋعا قوسقان ۇلەسىڭىز ءۇشىن سىزگە العىس ايتقىم كەلەدى. قىتاي مەن قازاقستان اراسىنداعى دوستىقتىڭ تاريحى تەرەڭدە جاتىر. توراعا سي ءتسزينپيننىڭ ستراتەگيالىق باسشىلىعىمەن جانە ءسىزدىڭ قولداۋىڭىزبەن ء«بىر بەلدەۋ, ءبىر جول» باستاماسى مەن «نۇرلى جول» ەكونوميكالىق دامۋ باعدارلاماسى ءساتتى ۇشتاستىرىلدى. ەكى ەل ماڭگىلىك ءارى جان-جاقتى ستراتەگيالىق سەرىكتەستىك ورناتتى. وتكەن جىلى ناۋرىز ايىندا شىڭجاڭ-ۇيعىر اۆتونوميالىق اۋدانى قكپ پارتيا كوميتەتىنىڭ حاتشىسى ما سينجۋي باستاعان دەلەگاتسيا قازاقستانعا كەلىپ, وتە ماڭىزدى كەلىسىمدەرگە قول جەتكىزگەنىن ەرەكشە اتاپ وتكەن ءجون. بىلتىر قازان ايىندا ءسىز شىڭجاڭ-ۇيعىر اۆتونوميالىق اۋدانىنا ساپارمەن كەلدىڭىز. بۇل ءوزارا ىنتىماقتاستىعىمىزدى ودان ءارى دامىتۋعا تىڭ سەرپىن بەردى, – دەدى شۇاا حالىق ۇكىمەتىنىڭ توراعاسى.
كەزدەسۋ سوڭىندا قاسىم-جومارت توقاەۆ شىڭجاڭ حالىق ۇكىمەتى توراعاسىنىڭ قازاقستانعا ساپارى وڭىرارالىق كووپەراتسيا مەن شەكارا ماڭىنداعى وبلىستاردىڭ ءوزارا ىنتىماقتاستىعىن ودان ءارى دامىتۋعا ىقپال ەتەتىنىنە سەنىم ءبىلدىردى.