اقتاۋ قالاسىندا جەرگىلىكتى تۇرعىن قالالىق پوليتسيا باسقارماسى قىزمەتكەرلەرى سوققىعا جىققانىن ايتتى, ونى ۇرلىق جاساعانىن مويىنداۋعا ماجبۇرلەگەن, دەپ حابارلايدى Egemen.kz.
«لادا» باسىلىمى جازعانداي, جابىرلەنۋشى 22 ناۋرىزدا جۇمىسقا بارار كەزدە كولىگىن وتالدىرا الماعان. ماسەلە گەنەراتوردىڭ ىستەن شىعىپ, اۋىستىرۋدى قاجەت ەتەتىندىگىندە بولعان.
ەر ادام 20 جىلدان بەرى بىلەتىن دوسى ۆيكتورعا جۇگىنۋدى ءجون كوردى. ونىڭ 21-شاعىناۋدانداعى وندىرىستىك بازاسىندا گەنەراتورلار بولعان. اشىق تۇرعان بازاعا كەلگەن ول اۆتوەلەكتريكتەن تەكسەرىپ, دۇرىسىن تاڭداۋ ءۇشىن ءتورت قۇرىلعىنى الىپ كەتەدى. ۆيكتورمەن حابارلاسا الماعاندىقتان, وعان ەسكەرتۋ مۇمكىن بولمايدى. كوپ ۇزاماي ۆيكتوردىڭ اعاسى بازاعا كەلىپ, گەنەراتورلاردىڭ جوعالعانىن ءبىلىپ, پوليتسياعا حابارلاعان.
وسى ۋاقىتتا ەر ادام كولىگىن جوندەپ, قالعان گەنەراتورلاردى جۇكسالعىشقا سالىپ, ۇيىنە قاراي بەت الادى. ءبىر ساعاتتان كەيىن جۇمىسقا كەلە جاتقاندا ونى جول پوليتسياسى توقتاتىپ, ونىڭ قىلمىس جاساعانى تۋرالى قوڭىراۋ تۇسكەنىن ايتادى. ولار پوليتسيا باسقارماسىنا بارۋدى ۇسىنعان.
ەر ادامدى پوليتسيا قىزمەتكەرى باۋىرجان كۇتىپ الىپ, كولىكتى باسقارما اۋماعىنا اكەلۋدى تالاپ ەتكەن. كۇدىكتى ۆيكتورعا تەلەفون سوعىپ, ءمان-جايدى تۇسىندىرمەك بولعان, بىراق باۋىرجان ونىڭ جەڭىنەن ۇستاپ, عيماراتتىڭ ىشىنە, ءۇشىنشى قاباتتاعى كەڭسەگە سۇيرەپ اپارىپ, تەلەفوندى تارتىپ العان.
ەر ادامنىڭ ايتۋىنشا, سول كەزدە تاعى ەكى ءتارتىپ ساقشىسى كەلىپ, بالاعات سوزدەر ايتىپ, گەنەراتورلاردى ۇرلاعانىن مويىنداۋدى تالاپ ەتكەن. ەر ادامدى تىڭداماستان, ءۇش پوليتسەي ونىڭ بەتىنەن, دەنەسىنەن جانە اياعىنان ۇرىپ-سوعا باستاعان.
ەر ادام پروكۋراتۋراعا شاعىم تۇسىرەتىنىن ايتقان. بۇل پوليتسەيلەردى ودان سايىن اشۋلاندىرىپ, ونى قاتتىراق ۇرا باستاعان. كوپ ۇزاماي ولارعا ۇرلىق راستالماعانى تۋرالى قوڭىراۋ كەلىپ, ۆيكتور ارىز جازۋدان باس تارتقان.
سودان كەيىن باۋىرجان جابىرلەنۋشىدەن كەشىرىم سۇراپ, پروكۋراتۋراعا شاعىمدانباۋدى وتىنەدى. الايدا جابىرلەنۋشى پوليتسيا بولىمشەسى عيماراتىنان شىعا سالا, قاداعالاۋ ورگانىنا دەرەۋ ارىزدانعان.
وبلىستىق كوپسالالى اۋرۋحانادا وعان كەۋدە, باس جانە بەت ايماعىنداعى جۇمساق تىندەردىڭ كوگەرۋى, سونىمەن قاتار جابىق باسسۇيەك-مي جاراقاتى جانە مي شايقالۋ دياگنوزى قويىلعان.
Lada.kz رەسمي پىكىر الۋ ءۇشىن ماڭعىستاۋ وبلىسى پد ءباسپاسوز قىزمەتىنە جۇگىنگەن. ۆەدومستۆودا اتالعان فاكت بويىنشا پروكۋراتۋرادا قىلمىستىق ءىس قوزعالعانىن حابارلادى.
ء«مان-جاي انىقتالىپ جاتىر. تەرگەۋ مۇددەسى ءۇشىن باسقا مالىمەت جاريالانبايدى», دەپ جاۋاپ بەردى وبلىستىق پوليتسيا دەپارتامەنتى وكىلدەرى.