قۇقىق قورعاۋ ورگاندارىنىڭ قىزمەتكەرلەرى جۇرگىزگەن رەيد بارىسىندا 2 توننادان استام ناسىباي ءونىمى تاركىلەندى. بۇل تۋرالى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ حابارلايدى.
اكىمدىك مالىمەتىنشە, استانادا تىيىم سالىنعان تەمەكى قوسپاسىمەن بەلسەندى كۇرەس ءجۇرىپ جاتىر. ەلوردانىڭ بارلىق اۋدانىندا ۆەيپ پەن ناسىبايدىڭ زاڭسىز تارالۋى مەن قولدانىلۋىن انىقتاۋ بويىنشا رەيدتەر جۇرگىزىلىپ جاتىر.
پوليتسەيلەر ساۋدا ورىندارىن تەكسەرىپ, تاراتۋشىلاردى اكىمشىلىك جاۋاپكەرشىلىككە تارتتى.رەيدتىك ءىس-شارالار اپتالىعىندا ەلوردانىڭ بەس اۋدانىندا 500-دەن استام ساۋدا ورنى تەكسەرىلدى.
«پوليتسيا دەپارتامەنتىنىڭ قىزمەتكەرلەرى اۋدان اكىمدىكتەرىمەن بىرلەسىپ, شەگىلمەيتىن تەمەكى ونىمدەرىن ساتۋدىڭ 70-كە جۋىق فاكتىسىن, ونىڭ ىشىندە ناسىباي ءوندىرىسى بويىنشا جەراستى تسەحتارىن انىقتادى.
رەيد بارىسىندا بايقوڭىر اۋدانىندا پوليتسيا قىزمەتكەرلەرى ناسىباي وندىرەتىن تسەحتى تاپتى. تاركىلەنگەن زاڭسىز ءونىمنىڭ جالپى سوماسى 10 ملن تەڭگەدەن اسادى.
استانا قالاسى پوليتسيا دەپارتامەنتىنىڭ قىزمەتكەرلەرى رەيد بارىسىندا وماروۆ جانە اسان قايعى كوشەلەرىنىڭ قيىلىسىنداعى جەكە ۇيدە 2 توننا ناسىباي ساقتالعانىن انىقتادى», دەلىنگەن حابارلامادا.
ناتيجەسىندە زاڭ بۇزۋشىلارعا 25 ايلىق ەسەپتىك كورسەتكىش (اەك) مولشەرىندە ايىپپۇل سالۋ تۇرىندە اكىمشىلىك قۇقىق بۇزۋشىلىق تۋرالى كودەكستىڭ (اقبتك) 196-بابىنا سايكەس اكىمشىلىك جاۋاپكەرشىلىككە تارتىلدى. بارلىق ونىمدەر تاركىلەندى.
ەلوردانىڭ ساۋدا ورىندارى بويىنشا رەيدتەر كۇن سايىن ءجۇرىپ جاتىر.