عالام عاجايىپتارى

روبوت OpenAI جۇيەلەرىمەن بىرىك­تىرىلگەن. ادامي سەزىم مەن اقىلدى روبوتتى جاساعان كومپانيا وزىنە «جالپى ماقساتتاعى گۋمانويدتى ومىرگە اكەلەتىن AI روبوتتەحنيكاسىنىڭ ءبىرىنشى ءتۇرى» دەگەن باعا بەرگەن. بۇل قۇلتەمىرلەر ونىم­دىلىكتى ارتتىرىپ, جۇمىس كۇشى تاپ­شىلىعىن جويىپ, قاۋىپتى جۇمىستاعى ادامداردىڭ سانىن ازايتۋعا كومەكتەسپەك.

Figure AI – تۇتىنۋشىلىق جانە كوممەرتسيالىق ماقساتتا گۋمانويدتى روبوتتاردى قۇراستىراتىن روبوتتەحنيكا كومپانياسى. كومپانيا اقىلدى روبوتتاردى جاساۋ ءۇشىن OpenAI-مەن سەرىكتەس بولىپ, 675 ميلليون دوللارلىق ينۆەستيتسيا تارتقان ەدى. قارجىلاندىرۋ راۋندىنا ينۆەستورلار دجەفف بەزوس, Microsoft, Nvidia, Intel, تاعى باسقالارى بار. تەحنولوگيا سالاسىنداعى كوپتەگەن الپاۋىت قۇرىلىمدار وسى كومپانيانىڭ ءبىر بولىگىن العىسى كەلەتىنى دە بەلگىلى.

اجالدان اراشالاعان ارا

اقش-تا تۇراتىن ەللي لوبەل ومىرمەن قوشتاسۋعا دايىندالىپ ءجۇر ەدى. كەنەت ونى ارا شا­عىپ الادى. سودان باستاپ ءبارى وزگەرەدى. 

27 جاستاعى ەللي لايما اۋرۋىن جۇق­تىرىپ, ءمان بەرمەگەنىنىڭ كەسىرىنەن ۋشىق­تىرىپ الادى. كۇندەردىڭ كۇنىندە دارىگەرلەردەن «از عانا ۋاقىتىڭىز قالدى» دەگەندى دە ەستيدى. وعان نەبىر دياگنوز قويىلادى: سكلەروز, لۋپۋس, رەۆماتويدتى ارتريت, فيبروميالگيا. كۇرەسۋدەن شارشاعان ايەل بارىنەن باس تارتىپ, كۇدەرىن ۇزەدى.

كاليفورنياعا بارعان كەزىندە وعان ارالار شابۋىل جاسايدى. تۇگىن قالدىرماي شاعىپ, ەلليدىڭ ساۋ-تامتىعى قالمايدى. بىراق ەڭ عاجابى – وسى شابۋىلدان كەيىن ول الدىڭعى دەرتىنەن قۇلانتازا ايىعادى. مەديتسينا كوزىمەن قاراساق, ارالار ەلليدى شاققان كەزدە, ونىڭ جاسۋشالارى نەيروندارىندا «TRPV1» دەپ اتالاتىن ارنايى بەلسەندىرەتىن قابىنۋ قوسىلىسىن شىعارعان. ياعني مەليتين – اعزاداعى باسقا فەرمەنتتەرگە اسەر ەتىپ, وزگە دە رەاكتسيالار جۇرگەن.

بۇل عاجايىپ وقيعا عىلىمي تۇردە ءالى زەرتتەلمەگەن. بىراق جانۋارلاردان الىناتىن ۋلاردى ادامدارعا زيان كەلتىرەتىن توكسيندەردى ەمدەۋ ءۇشىن دە قولدانۋعا بولاتىندىعى بۇرىننان بەل­گىلى. مىسالى, ازيادا ارالار عاسىرلار بويى دارىلىك ماقساتتا قولدانىلعان. ريم يمپەرياسىنىڭ قۋاتتى جاۋى پونتۋس پاتشاسى ميتريدات تا دالا جىلانىنىڭ ۋىمەن قان كەتۋدى توقتاتىپ, پولە دالاسىندا اۋىر جاراقاتتان, ولىمنەن قۇتىلدى دەگەن دە ءسوز بار.