ناۋرىز – اس ءىشىپ, اياق بوساتاتىن كوپ مەيرامنىڭ ءبىرى ەمەس, ىزگىلىك پەن مەيىرىمگە ۇندەيتىن, تاربيەلىك ءمانى زور مەرەكە. وسى كۇندەرى قاريالارعا قولعانات بولىپ جۇرگەن قارشاداي بالالاردى كورگەندە ەل ەرتەڭىنە دەگەن سەنىمىڭ بەكي تۇسەدى.
قار كوپ جاۋعان جىلدارى كوگىلدىر كوكتەم وزىمەن بىرگە ءبىرشاما قيىندىقتى ەرتە كەلەتىنى بار. وبلىس ورتالىعىنىڭ ىرگەسىندەگى زاستانتسيوننىي كەنتى قاسات قارعا مەلتەكتەپ, تۇرعىنداردىڭ اۋلاسى تولىپ, جاياۋ جۇرگىنشىنىڭ جولى تارىلىپ قالادى. مۇنداي جاي اسىرەسە جالعىزىلىكتى ادامدار ءۇشىن قيىن. كەنتتەگى مەكتەپ وقۋشىلارى قولى قىسقا ادامدارعا كومەكتەسىپ جاتىر. ىزگىلىككە تولى جاس جۇرەكتەردىڭ شاراپاتىن كورىپ جاتقاندار دا از ەمەس.
ء–ۇش جىلدان بەرى مۇگەدەكپىن. بالالارىم رەسەيگە كوشىپ كەتكەن, – دەيدى كەنت تۇرعىنى سۆەتلانا گورست, – كەيدە كورشىلەرىم دە كومەك قولىن سوزىپ جاتادى. ازىق-ت ۇلىك اكەلىپ بەرەدى, ءدارى-دارمەككە دە مۇقتاجبىن. ال اۋلاداعى قاردى تازالاۋعا شامام كەلمەيدى. تازالاماي تاعى بولمايدى. كولكىگەن كوپ سۋ ىشكە ەنىپ كەتۋى دە مۇمكىن. اۋلاداعى قار ءبىر ەرىپ, ءبىر قاتىپ, كوك مۇزعا اينالىپ قالدى. نە ىستەرىمدى بىلمەي وتىر ەدىم, مىنا اينالايىن بالالاردىڭ كەلىپ, تازالاپ جاتقانىن كورگەندە جۇرەگىم ەلجىرەپ كەتتى. التى اي قىس ايازدان توڭعان جۇرەكتى قارشاداي بالالاردىڭ ىزگىلىككە تولى جۇرەك ءلۇپىلى جىلىتىپ جاتىر.
كەيۋانا ايتسا ايتقانداي, وتكەن جىلعى كوكتەمدە ەرىگەن قار سۋى ءۇيدىڭ ىشىنە دە ەنىپ كەتسە كەرەك. ءسال ەڭىستە تۇرعاندىقتان جول جيەگىندەگى جىلعالاردان سىزدىقتاپ اققان قىزىل سۋدىڭ الدىن الىپ تازالاماسا, قۇلديلاي قۇلاپ, لاپ بەرگەلى تۇر.
– ءبىز اجەيدىڭ اۋلاسىن تازالاپ بەردىك, – دەيدى №14 مەكتەپتىڭ وقۋشىسى ازامات ستال, – جالعىز وسى ءۇيدىڭ عانا ەمەس, ءالى دە بىرنەشە ۇيگە كومەك كورسەتۋىمىز قاجەت بولىپ تۇر.
قالا اكىمشىلىگىنىڭ اقپاراتىنا قاراعاندا, كەنتتەگى قار تازالاۋ قىس بويى جۇرگىزىلىپ كەلەدى. كۇنى بۇگىنگە دەيىن 5 مىڭ تەكشە مەتر قار شىعارىلىپتى. كوكتەم سايىن بەينەتتى بەلشەسىنەن كەشەتىن كەنتتىڭ جەراستى سۋى كولكىپ تۇر. قار سۋىنىڭ بىردەن ءسىڭىپ كەتپەيتىنى دە سوندىقتان. مۇنداي كەزدە تياناقتى جۇمىس ىستەمەي تاعى بولمايدى. ۇلكەندەردىڭ ۇلگەرمەي جاتقان ءىسىن بالالاردىڭ جالعاستىرعانى جاراسىمدى كورىنەدى ەكەن.
كوكشەتاۋ