ماڭعىستاۋ وبلىسىندا جالعان سەرتيفيكات جاساتىپ, بىلىكتىلىگىن ارتتىرماق بولعان مۇعالىمدەردىڭ ءىسى اشكەرە بولدى. دەرەككە قاتىستى قالاداعى وقۋ-ادىستەمەلىك ورتالىعىنىڭ باسشىلارى تۇسىنىك بەردى, دەپ حابارلايدى Egemen.kz.
الماتى ارناسىنىڭ حابارلاۋىنشا, ءبىلىم سالاسىنداعى كەلەڭسىزدىكتى اقتاۋداعى مۇعالىمدەردىڭ ءبىرى جاريا ەتكەن. «سەرتيفيكات الۋعا مەكتەپ باسشىلىعى ماجبۇرلەدى» دەگەن ول ءار قۇجاتتىڭ كەمى 17 مىڭ تەڭگە تۇراتىنىن ايتتى. زاڭعا قايشى كەلەتىن مۇنداي ارەكەتتى ايتقانى ءۇشىن ازاماتتىڭ باسى دا داۋعا قالعان.
«30 شاقتى ادام الدى. مەكتەپ اكىمشىلىگى الاياقتارمەن اينالىسادى دەپ, كەرىسىنشە مەنىمەن اينالىسىپ كەتتى. ساپالى ءبىلىم, ادىلدىك قايدا؟ سانالى ۇرپاق تاربيەلەمەيمىز بە؟ مەكتەپ اكىمشىلىگىنىڭ قاتىسى بار دەپ ويلايمىن. جۇمىستان شىعىپ قالامىن دەپ قورىقپايمىن. زاڭسىز ەشتەڭە ىستەمەدىم. ازاماتتىق پوزيتسيام», دەدى ۇستاز جاڭىلسىن بارساەۆا.
ءىستىڭ اق-قاراسىن اجىراتقان وڭىردەگى «ادىلدىك جولى» قوعامدىق بىرلەستىگى سەرتيفيكاتتاردىڭ راسىندا زاڭسىز جولمەن الىنعانىن انىقتاعان. جاۋاپتى ورىن استاناداعى وقۋ-ادىستەمەلىك ورتالىعىنا رەسمي حات جولداپ, تىزىمدەگى 40-قا جۋىق مۇعالىمنىڭ بىلىكتىلىك كۋرسىنان وتپەگەنىن ءبىلدى.
«ورلەۋ-Education» ورتالىعىنان كەلىپ وتىرعان سۇرانىس حاتقا جاۋاپ بەردى. ولار مۇنداي ۇلگىدە سەرتيفيكات شىعارمايتىنىن جەتكىزگەن. سونىمەن قاتار كورسەتىلگەن مەرزىمدە, جەلتوقساندا وقۋ كۋرسى وتپەگەن», دەدى «ادىلدىك جولى» قوعامدىق بىرلەستىگىنىڭ ماڭعىستاۋ وبلىستىق فيليالى ديرەكتورى اسقار جاقسىباەۆ.
بۇل دەرەككە قاتىستى قالاداعى وقۋ-ادىستەمەلىك ورتالىعىنىڭ باسشىلارى تۇسىنىك بەردى.
مۇعالىمدەر ءۇش جىل سايىن بىلىكتىلىگىن ارتتىرۋعا مىندەتتى جانە ارنايى كۋرستان وتۋگە ءتيىس» دەگەن ولار بىلىكتىلىك ساناتىنا قاراي جالاقى تولەنەتىنىن ايتتى. ال كۋرستان وتپەگەن ۇستازداردىڭ ايلىعى از بولادى.
«مەكتەپ اكىمشىلىگى جاعدايىنا قارايدى, اقىلى وتە مە, جوق پا, وزدەرى شەشەدى. بۇل كۋرستى وقۋعا حات جىبەرىلمەدى. وزدەرى ىزدەپ تاۋىپ العان. مۇعالىمنىڭ ايلىعىنا اسەر ەتەدى. كاتەگوريا الا الماي قالسا, ارقايسىنىڭ بەلگىلەنگەن اقشا مولشەرى تولەنبەيدى», دەدى وقۋ-ادىستەمەلىك ورتالىعىنىڭ ديرەكتورى كۇلپان ميروۆا.
تەلەارنا ءتىلشىسىنىڭ حابارلاۋىنشا, قازىر اتالعان ىسكە قاتىسى بار دەگەن مۇعالىمدەردەن جاۋاپ الىنىپ, تەرگەۋ باستالدى. وبلىستىق پوليتسيا دەپارتامەنتى «جالعان قۇجاتتاردى قولدان جاساۋ, دايىنداۋ نەمەسە وتكىزۋ فاكتىسى بويىنشا» قىلمىستىق ءىستى تىركەپ ۇلگەردى. زاڭعا سايكەس, دەرەك راستالعان جاعدايدا ازاماتتاردى 4 جىلعا باس بوستاندىعىنان ايىرۋ نەمەسە ءىرى كولەمدە ايىپپۇل ارتۋ قاراستىرىلعان.