بۇگىن ۇكىمەت وتىرىسىندا «اۋىل – ەل بەسىگى» باعدارلاماسىن ىسكە اسىرۋ جوسپارى تالقىلاندى. ۇلتتىق ەكونوميكا ءمينيسترى ن.بايبازاروۆ باعدارلاما شەڭبەرىندە اۋىلدىق وكرۋگتەردىڭ تابىسىن 2,5 ەسە ارتتىرۋ ۇسىنىسىن ورتاعا سالدى, دەپ جازادى Egemen.kz.
ءمينيستردىڭ ايتۋىنشا 2019-2023 جىل ارالىعىندا «اۋىل – ەل بەسىگى» باعدارلاماسىنا بيۋدجەتتەن 524 ملرد تەڭگە ءبولىنىپ, 1,8 مىڭ تىرەك جانە سپۋتنيكتىك اۋىلداردا 5,4 مىڭنان استام جوبا ىسكە اسىرىلعان.
«بۇل تۇرعىن ءۇي-كوممۋنالدىق شارۋاشىلىق سالاسىنداعى 578 نىساندى, 1,7 مىڭ الەۋمەتتىك نىساندى جانە 3 مىڭنان استام اۋىلىشىلىك جولداردى سالۋعا جانە جوندەۋگە مۇمكىندىك بەردى. سونداي-اق بيىل رەسپۋبليكالىق بيۋدجەتتەن 179 ملرد تەڭگە ءبولىنىپ, 500-دەن استام اۋىلدا 1,4 مىڭ جوبانى ىسكە اسىرۋ جوسپارلانىپ جاتىر», دەدى ن.بايبازاروۆ.
سونداي-اق اۋىل ەكونوميكاسىن قارقىندى دامىتۋ ءۇشىن اۋىل بيۋدجەتىنىڭ كىرىستەر بولىگىن ۇلعايتۋ كوزدەلىپ وتىر.
«وسى ماقساتتا بيۋدجەتتىڭ IV دەڭگەيىندەگى كىرىستەرىن 2,5 ەسە ارتتىرىپ, 167 ملرد تەڭگەگە جەتكىزۋگە مۇمكىندىك بەرەتىن قوسىمشا سالىقتار مەن تولەمدەردىڭ كەيبىر تۇرلەرىن بەرۋ جوسپارلانۋدا. اتاپ ايتقاندا, جەكە جانە زاڭدى تۇلعالاردىڭ م ۇلىك سالىعىنىڭ 50%-ى, جەكەلەگەن قىزمەت تۇرلەرىمەن اينالىسۋ قۇقىعى ءۇشىن ليتسەنزيالىق الىم, پايدالانعانى ءۇشىن تولەماقى جانە جەر ءۇستى كوزدەرىنىڭ سۋ رەسۋرستارىن پايدالانعانى ءۇشىن تولەم», دەدى ۇلتتىق ەكونوميكا ءمينيسترى.