سەنات سپيكەرى ماۋلەن اشىمباەۆتىڭ توراعالىعىمەن وتكەن پالاتا بيۋروسىنىڭ وتىرىسىندا دەپۋتاتتار الداعى ءىس-شارالاردى تالقىلادى جانە 28 ناۋرىز كۇنى بولاتىن سەنات وتىرىسىنىڭ كۇن ءتارتىبىن بەكىتتى, دەپ حابارلايدى Egemen.kz.
سەناتورلار وسى اپتادا ەلدىڭ عىلىمي-تەحنيكالىق جانە يننوۆاتسيالىق الەۋەتىن دامىتۋ ماسەلەلەرى بويىنشا بىرقاتار كەزدەسۋ وتكىزبەك. سونداي-اق كەيبىر زاڭداردىڭ ىسكە اسىرىلۋ بارىسىن تالقىلاپ, مەملەكەت باسشىسىنىڭ تاپسىرمالارىن ورىنداۋ اياسىندا پاۆلودار وبلىسىندا وڭىرلەردىڭ بيۋدجەتتىك دەربەستىگىنە ارنالعان كوشپەلى وتىرىس ۇيىمداستىرۋ كوزدەلىپ وتىر. سەنات توراعاسى ءوز سوزىندە اتالعان ءىس-شارالاردىڭ ماڭىزدى باعىتتارىنا نازار اۋداردى.
پالاتانىڭ الداعى وتىرىسىندا دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قارايدى. قۇجات تەحنيكالىق رەتتەۋ, ۆەتەريناريالىق-سانيتاريالىق جانە كارانتيندىك فيتوسانيتاريالىق شارالار, تۇتىنۋشىلاردىڭ قۇقىقتارىن قورعاۋ, تاريفتىك ەمەس رەتتەۋ جانە مەملەكەتتىك ساتىپ الۋ ماسەلەلەرىنە قاتىستى ەۋرازيالىق ەكونوميكالىق وداقتىڭ قولدانىستاعى قۇقىقتىق نەگىزىندە كەزدەسەتىن ولقىلىقتاردى جويۋعا باعىتتالعان.
سونىمەن قاتار سەنات وتىرىسىندا «2000 جىلعى 7 شىلدەدەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ دا قارالادى. زاڭ ەكى مەملەكەت اراسىنداعى دوستىق قارىم-قاتىناستى ودان ءارى نىعايتۋدى, تاراپتار ازاماتتارىنىڭ ساپارلارىن رەتتەۋدى, سونداي-اق ءبىر مەملەكەت ازاماتتارىنىڭ ەكىنشى مەملەكەتتىڭ اۋماعىندا بولۋى ءۇشىن قولايلى جاعدايلار جاسايتىن قۇقىقتىق نەگىز قۇرۋدى ماقسات تۇتادى.