بۇگىن اتىراۋ قالاسىندا ۇلتتىق قۇرىلتايدىڭ ءۇشىنشى وتىرىسى ءوتتى. ءاز ناۋرىز قارساڭىنداعى بۇل جيىننىڭ جايىق جاعاسىندا, تاريحتا حان ورداسى اتانعان سارايشىق قالاسى جانىندا ۇيىمداستىرىلۋى دا بەكەر ەمەس. ۇلتتىق قۇرىلتاي قوعامداعى ايتىلىپ جۇرگەن ماسەلەلەر قارالاتىن, قاراپايىم حالىق كوتەرىپ جاتقان جايتتار ورتاعا سالىناتىن ورتا. بۇل ەلدىگىمىز بەن ەگەمەندىگىمىزدى, بىرلىگىمىز بەن بەرەكەمىزدى بەكەمدەيتىن ماسەلەلەر كوتەرىلەر جەر.
بۇل جولى دا قۇرىلتاي جۇمىسىنا قاتىسقان پرەزيدەنت قاسىم-جومارت توقاەۆ ءبىراز دۇنيەلەر تۋرالى وي تولعاپ, ورتاق شەشىمدەر جاساۋ كەرەكتىگىن ايتتى.
- ءسوزىن حالىقتىڭ بىرلىگى, ۇلتتىڭ تاتۋلىعى تاقىرىبىنان باستاعان پرەزيدەنت ەل اعالارى اراسىنداعى اۋىزبىرشىلىككە دە توقتالدى. قازاقتىڭ قايماعى, ۇلتتىڭ ماقتانىشى بولعان ادامدار ۇرپاققا ونەگە بولاتىن كەسەك اڭگىمە ايتۋى قاجەت, - دەدى پرەزيدەنت. ايتپاسىنا بولمادى.
تاريحي تۇلعالاردىڭ ءرولىن سالىستىرىپ, ءبىر-بىرىنە قارسى قويىپ جاتقانداردى دا سىنادى. ءار زاماننىڭ ءوز شىندىعى بار, بىراق تاريح تۇتاس. بۇل حالقىمىزدىڭ ءجۇرىپ وتكەن جولى. الەۋمەتتىك جەلى مەن باسپاسوزدە بەلگىلى ادامداردى ءبىر-بىرىنە قارسى قويعاننان تۇك ۇتپايمىز. سىرت كوزدىڭ سىنىندامىز!
بوس ءسوز, جەلەڭ اڭگىمەگە ءۇيىرمىز. ەسەسىنە كىتاپ وقىمايتىن ۇرپاق ءوسىپ كەلە جاتىر. ۇيدەگى بالانىڭ كامەلەتتىك جاسقا كەلگەنشە ءبىر كىتاپ وقىماعانىندا شارۋامىز جوق, ەسەسىنە الەۋمەتتىك جەلىدە بىرەۋدىڭ قىرىلىسقانىنا ريزامىز. الداعى ۋاقىتتى «ۇلتتىق كىتاپ كۇنى» بەلگىلەنۋى مۇمكىن. دۇرىس باستاما دەپ ويلايمىن.
پرەزيدەنت قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستاعانىن ايتتى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق ەكەندىگىن تاعى دا قايتالادى.
«مەن ەكونوميكانى دامىتۋ ءۇشىن «كرەاتيۆتى يندۋستريانىڭ» ءمان-ماڭىزى زور ەكەنىن ۇنەمى ايتىپ ءجۇرمىن. بۇل مەملەكەتتىك ءتىلدىڭ بولاشاعى ءۇشىن دە وتە ماڭىزدى. قازاق ءتىلىن دامىتامىز دەسەك, قازىرگى زامانعى ءادىس-تاسىلدەردى بارىنشا ءتيىمدى پايدالانعان دۇرىس», دەدى مەملەكەت باسشىسى.
كەي كەزدە ءبىزدىڭ قوعام مەن ءۇشىن وزگەنىڭ قاڭسىعىنا تەز ەلىكتەگىش, تەرىس دۇنيەگە يممۋنيتەتى مۇلدە جوق ءالسىز قوعام بولىپ كورىنەدى. قاي-قايداعى ەسىرتكى, ەلىكتىرگىش زاتتار ءبىزدى تابادى. ۇتىس ويىنىنىڭ سان ءتۇرى بىزگە كىرىپ العان. قانشاما ادام لۋدومانيانىڭ قۇربانى بولىپ, ءوزىنىڭ دە, وزگەنىڭ دە ءومىرىن بۇزىپ جاتىر. جات ۇيىمدار كەلىپ, ءداستۇرلى ۇعىمدارىمىز بەن قۇندىلىقتارىمىزعا شابۋىل جاساپ جاتىر. ايەلدى كەمسىتىپ, ءولتىرىپ قويۋ ساۋ ادامدار جاسايتىن دۇنيە ەمەس قوي!
ەلىنە, حالقىنا اراشا تۇسكەن پرەزيدەنت ء«بىز حالقىمىزدىڭ رۋحاني نەگىزىن قۇرمەتتەي وتىرىپ, مەملەكەتىمىزدىڭ زايىرلى ەل رەتىندەگى مارتەبەسىن كۇشەيتە ءتۇسۋىمىز كەرەك. قازاقستان ءوزىنىڭ مەملەكەتتىلىگىنە جانە قوعامدىق مورالىنە قايشى كەلمەيتىن ءدىني نانىم-سەنىمدەردىڭ, ءتۇرلى تانىمدار مەن ىلىمدەردىڭ بارىنە تۇسىنىستىكپەن قارايدى. بىراق ءبىز باتىستىڭ, يا بولماسا باسقا دا كوزقاراس يەلەرىنىڭ ىقپالىمەن ءتول مادەنيەتىمىزگە جات ءارى الەمنىڭ دۋاليستىك نەگىزىنە كەرەعار قۇندىلىقتاردى ناسيحاتتاۋشىلاردىڭ جەتەگىنە ەرىپ كەتە المايمىز, كەتپەيمىز دە!» دەپ, وتباسى ينستيتۋتى مەن رۋحاني دامىعان قوعامىمىزدى ساقتاۋعا شاقىردى.
اسەم راحمەتوۆا,
پارلامەنت سەناتىنىڭ دەپۋتاتى