جوعارعى سوت جانە «ورتالىق ازياداعى قۇقىقتىق مەملەكەتتىلىككە جاردەمدەسۋ» اتتى گەرمانيانىڭ حالىقارالىق ىنتىماقتاستىق قوعامى (GIZ) ۇيىمداستىرۋىمەن الماتى قالاسىندا «ورتالىق ازياداعى اكىمشىلىك سوت ءىسى» اتتى اكىمشىلىك ىستەر بويىنشا سۋديالارعا ارنالعان VI ايماقتىق سەمينار ءوتىپ, بارلىق وبلىستاردان كەلگەن 50-گە جۋىق سۋديا اكىمشىلىك ورگاندار قىزمەتىنىڭ قۇرالدارىن: سوت قورعاۋىنىڭ شەگى جانە ەرەكشەلىكتەرىن تالقىلادى.
جوعارعى اكىمشىلىك ىستەر جونىندەگى سوت القاسىنىڭ توراعاسى اسلان تۇكيەۆ ءوز سوزىندە, اكىمشىلىك ىستەردىڭ جىل سايىن كوبەيىپ كەلە جاتقانىن, ونىڭ باسىم بولىگى تۇرعىن ءۇي, سالىق, جەر داۋلارىنا قاتىستى ەكەنىن اتاپ ءوتتى. ايتۋىنشا, مەملەكەتتىك ورگاندارعا قاتىستى تالاپ قويۋلاردىڭ 60 پايىزدان استامى قاناعاتتاندىرىلعان.
سونداي-اق ول مەملەكەتتىك ورگاندار اراسىنداعى داۋلاردى شەشۋ وكىلەتتىكتەرىن ۇكىمەتكە بەرۋ تۋرالى ايتىپ ءوتتى. بۇل تۋرالى پارلامەنت ءماجىلىسى ءبىرىنشى وقىلىمدا ماقۇلداعان اكىمشىلىك ادىلەت سالاسىن جەتىلدىرۋ جانە قولدانۋ اياسىن كەڭەيتۋ ماسەلەلەرى جونىندەگى زاڭ جوباسىندا ايتىلعان. وندا ازاماتتىق حال اكتىلەرى جازبالارىنىڭ دۇرىس بەلگىلەنبەۋى تۋرالى ىستەر تۋرالى داۋلاردى اكىمشىلىك ادىلەتكە بەرۋ اپك-ءتىڭ 44-تاراۋى); نورماتيۆتىك قۇقىقتىق اكتىنىڭ زاڭدىلىعىن داۋلاۋ تۋرالى (اپك-ءنىڭ 30-تاراۋى) جانە ت.ب. قاراستىرادى.
سەمينار بارىسىندا تۇركىمەنستانداعى GIZ جوباسىنىڭ جەتەكشىسى يورگ پۋدەلكا, قر جوعارعى سوتىنىڭ ءاىجسا-نىڭ توراعاسى ا.تۇكيەۆ جانە وزبەكستان جوعارعى سوتىنىڭ سۋدياسى ديلمۋرود كاريموۆ اكىمشىلىك اكت تۋرالى ايتىپ ءوتتى.
اكىمشىلىك اكتىنە شاعىمدانۋداعى سوت ءتارتىبى تۋرالى تاجىكستان جوعارعى سوتىنىڭ سۋدياسى سالومات حاكيمزودا, گەرمانيانىڭ اكىمشىلىك سوتىنىڭ سۋدياسى دانيەل دەبا, قىرعىزستان قالالىق سوتى توراعاسىنىڭ ورىنباسارى بولوتبەك ساتىبالديەۆ جانە قازاقستانداعى GIZ جوباسىنىڭ قۇرامداس بولىگىنىڭ جەتەكشىسى المات عابباسوۆ ءسوز سويلەدى.
اكىمشىلىكتىڭ كەيبىر اسپەكتىلەرى تۋرالى وزبەكستاننىڭ سۋديالار جوعارى مەكتەبىنىڭ اكىمشىلىك قۇقىق كافەدراسىنىڭ مەڭگەرۋشىسى باتىر سامارحودجاەۆ, GIZ جوباسىنىڭ تاجىكستانداعى ۇلتتىق ۇيلەستىرۋشىسى ابۋباكر ينوموۆ, تۇركىستان وبلىستىق سوتىنىڭ اكىمشىلىك ىستەر جونىندەگى سوت القاسى توراعاسىنىڭ مىندەتىن اتقارۋشى ايدا بايتۋروۆا مەن قىرعىزستاننىڭ اكىمشىلىك سوتىنىڭ سۋدياسى نازگۇل اتاكانوۆا ويلارىن ورتاعا سالىپ, مازمۇندى پىكىر الماستى.
سەمينار سوڭىندا ا.تۇكيەۆ قازاقستانداعى اكىمشىلىك ادىلەت ينستيتۋتىنىڭ جۇمىس ىستەگەنىنە سالىستىرمالى تۇردە كوپ ۋاقىت وتپەسە دە, ول ازاماتتاردىڭ, بيزنەستىڭ زاڭ ۇستەمدىگىنە دەگەن قاتىناسىن قازىردىڭ وزىندە وزگەرتىپ جاتقانىن باسا ايتتى. سونداي-اق ول سوت تورەلىگىن جۇزەگە اسىرۋ ساپاسىن جاقسارتۋ ماقساتىندا اشىق تالقىلاۋعا دايىن ەكەنىن اتاپ ءوتتى.