اتىراۋدا ءوتىپ جاتقان ۇلتتىق قۇرىلتاي جيىنىندا مەملەكەت باسشىسى قاسىم-جومارت توقاەۆ ۇلتتىق قۇندىلىقتار جۇيەسىن قۇرۋدى ۇسىنىپ, قوعامدا بەلەڭ العان تەرىس ارەكەتتەردى سىنادى, دەپ جازادى Egemen.kz.
ء«اربىر قازاق اتا-باباسىن قۇرمەتتەيدى, رۋحىنا تاعزىم ەتەدى. سوندىقتان, شەجىرە ءبىزدىڭ مادەني كودىمىزدىڭ اجىراماس بولىگىنە اينالعان. بىراق ءبىز تەك قانا وسى تۇسىنىكپەن شەكتەلىپ قالماۋىمىز قاجەت. ەڭ باستىسى, بۇل ماسەلەنى ەشقاشان ساياساتپەن ارالاستىرۋعا بولمايدى», دەدى پرەزيدەنت.
قاسىم-جومارت توقاەۆ شەتەلدىكتەر ءبىزدىڭ ەلدى «ەسكەرتكىشتەر ەلى» دەپ اتايتىنىن ەسكەرىپ, اتا-باباسىنىڭ اتىنا كوشە بەرۋ, ەسكەرتكىش قويۋدى ۇسىنىپ ۇجىمدىق حات جازاتىنداردىڭ قاتارى قالىڭداپ بارا جاتقانىن تىلگە تيەك ەتتى.
«سوڭعى كەزدە اتا-باباسىنىڭ, جەرلەسىنىڭ ەسىمىن ۇلىقتاۋدى سۇراپ, ۇجىمدىق حات جازۋ ادەتكە اينالىپ بارادى. اتاسىنا ەسكەرتكىش قويۋدى, كوشەگە اتىن بەرۋدى وتىنەتىندەر كوبەيدى. بۇل – جاعىمسىز جاعداي. مۇنداي ۇستانىمدار ەلىمىزدىڭ ءبىرتۇتاس يدەولوگيالىق كەڭىستىگىنە زيان كەلتىرەدى. ۇرپاق تاربيەسىنە كەسىرىن تيگىزەدى. ءتىپتى, شەتەلدە ءبىزدى كونە زامانعا جانە كەڭەستىك كەزەڭگە قاتىستى مونۋمەنتتەر قاپتاعان «ەسكەرتكىشتەر ەلى» دەپ ايتاتىن بولدى», دەدى ق.توقاەۆ.
پرەزيدەنت ونوماستيكا سالاسىندا رەسپۋبليكا, بىرلىك, تاۋەلسىزدىك سىندى ۇعىمدارعا باسا نازار اۋدارۋ كەرەك ەكەنىن اتاپ ءوتتى.