تانىمال انشىلەر توقتار سەرىكوۆ پەن بەيبىت سەيدۋاليەۆا Qazaqstan ۇلتتىق تەلەارناسىنداعى باعدارلامادا قوناق بولىپ, وتباسى قۇندىلىعى تۋرالى ءسوز قوزعادى, دەپ حابارلايدى Egemen.kz.
ونەر يەسىنىڭ ايتۋىنشا, اراداعى ماحابباتتى ماڭگى ساقتاۋ ءۇشىن ادام ءبىر-ءبىرىن باعالاۋى كەرەك.
«اداممەن بىرگە ماڭگى, عۇمىرى بىتكەنشە جاسايتىن ماحاببات. اباي اتامىز «ماحابباتسىز دۇنيە بوس» دەپ ايتادى. شىنىمەن دە, ادامنىڭ ماحابباتى بىتكەن كۇنى – ءوزىنىڭ بىتكەن كۇنى. اللادان سۇراپ العان جالعىز ادام بولسا, ول قاسىمداعى بەيبىت قوي. ول ماعان ەركەلەۋى كەرەك, مەن وعان ەركەلەۋىم كەرەك. ونى جانە مەنى ەركەلەتەتىن ادامدار الىستا», - دەيدى توقتار سەرىكوۆ.
«العاشقى كوزقاراس, ءبىر-بىرىمىزگە دەگەن سۇيىسپەنشىلىكتى بارىنشا الاقاندا ايالاپ, ساقتاۋ كەرەك ويلايمىن. ماحاببات دەگەن – قايتىپ كەلمەيتىن دۇنيە. سوندىقتان سىيلاستىق, ەرلى-زايىپتىنىڭ اراسىندا مادەنيەت دەگەن بولۋ كەرەك, سول ارقىلى ماحابباتتى ساقتاپ قالۋ كەرەك دەپ ويلايمىن», - دەيدى بەيبىت سەيدۋاليەۆا.
توقتار سەرىكوۆ وتباسىن قۇرعان العاشقى جىلدارى ەر ازاماتتاردا قانداي سەزىم بولاتىنىن ايتتى.
«ەر ازاماتتاردا ۇرەي بولادى, ءوز باسىمدا بولعان, جاسىرمايمىن. ابدەن ءجۇرىپ, نازاردى وزىمىزگە اۋدارىپ ۇيرەنىپ قالعانبىز. ەرتەڭ ۇيگە قامالىپ, ءبىر ادامنىڭ الدىندا عانا ءومىر ءسۇرۋ ەر ازامات ءۇشىن اقىرەت سياقتى بولىپ كورىنەدى. ولاي ەمەس ەكەن. قازاقتىڭ ءادىمى ءسوزى بار, ء«بىر جاستىقتا قارتايىڭدار» دەگەن. ...جۇبايىڭ ءسوزىڭدى قۇپتاۋى ءۇشىن قاسىڭدا كوپ بولۋى كەرەك. وتباسى بولعانىمىزعا كوپ ەمەس, 17 جىل بولدى. بىراق ماعان كەشە عانا سياقتى», - دەيدى ءانشى.
ءانشى بەيبىت سەيدۋاليەۆا وتباسىنداعى بەرەكە-بىرلىكتى, تۇراقتىلىقتى ساقتاۋ الدىمەن ايەلگە بايلانىستى دەپ ەسەپتەيدى.
«بارلىعى ايەل ادامعا بايلانىستى دەپ ويلايمىن. ايەل ادام ۇيدەگى شۋدى شىعارماي, تىگىسىن جاتقىزىپ, جاماندى جاسىرىپ, جاقسىنى اسىرىپ, شىدامدىلىقتى, توزىمدىلىكتى, اقىلدىلىقتى كورسەتسە, بارلىعىن ساقتاپ قالادى», - دەيدى ءانشى ونەر يەسى.