جەتىسۋلىق دارىگەرلەر ينسۋلت العان 76 جاستاعى ناۋقاسقا بىرەگەي وپەراتسيا جاساپ, اجالدان اراشالاپ قالدى. مي تامىرىنىڭ قىسىلۋىمەن اۋرۋحاناعا تۇسكەن قارياعا دەر كەزىندە كومەك كورسەتكەن اقجەلەڭدىلەر جاڭا مەديتسينالىق ءادىستى پايدالانعان. قازىر ناۋقاستىڭ جاعدايى قالىپتى.
جەتىسۋ وبلىسىندا مىندەتتى الەۋمەتتىك مەديتسينالىق ساقتاندىرۋ اياسىندا ءينسۋلتتى ەمدەۋدە العاش رەت يننوۆاتسيالىق ءتاسىل قولدانىلدى. تالدىقورعان قالاسىنداعى وبلىستىق اۋرۋحانا دارىگەرلەرى سول جاق ورتاڭعى مي ارتەرياسى باسسەينىندە ءجىتى يشەميالىق ينسۋلتپەن اۋىراتىن ناۋقاسقا بىرەگەي وپەراتسيا جاسادى. وڭىردە تۇڭعىش رەت قولدانىلعان ەمدەۋ ءادىسى «ستەنت-رەتريۆەردىڭ كومەگىمەن مەحانيكالىق رەنتگەنەندوۆاسكۋليارلىق ترومبوەكستراكتسيا» دەپ اتالادى.
اتالعان ءتاسىل ميدىڭ بىتەلگەن تامىرىنان ترومبتى مەحانيكالىق تۇردە الىپ تاستاۋعا مۇمكىندىك بەرەتىن ارنايى مەديتسينالىق قۇرال «ستەنت-رەتريۆەردى» قولدانۋعا نەگىزدەلگەن. پروتسەدۋرا رەنتگەندىك باقىلاۋ ارقىلى جۇزەگە اسادى. بۇل ءدال جانە قاۋىپسىز جۇمىس ىستەۋگە مۇمكىندىك بەرەدى. نەيروحيرۋرگ ايرات ءجۇنىسوۆتىڭ ايتۋىنشا, بۇل ءادىستىڭ بىرەگەيلىگى ونىڭ مينيمالدى ءينۆازيۆتى سيپاتى مەن جوعارى تيىمدىلىگىندە جاتىر.
«پروتسەدۋرا بارىسىندا ءبىز ميدىڭ بىتەلىپ قالعان تامىرىنا ستەنت-رەتريۆەردى ەنگىزەمىز, ول ترومبتى ۇستاپ, ونى الىپ تاستايدى, قالىپتى قان اينالىمىن قالپىنا كەلتىرەدى جانە ميدىڭ زاقىمدانۋىن بولدىرمايدى. بۇل ءادىس قان اعىمىن تەز جانە ءتيىمدى قالپىنا كەلتىرۋگە مۇمكىندىك بەرەدى, ءينسۋلتتىڭ اسەرىن ايتارلىقتاي ازايتادى جانە ناۋقاستىڭ دەنساۋلىق جاعدايىن جاقسارتادى. وپەراتسيا ءۇش ساعاتقا سوزىلدى, ناۋقاس نەيروحيرۋرگيا بولىمىنە اۋىستىرىلدى», دەيدى ا.ءجۇنىسوۆ.
دارىگەر اتاپ وتكەندەي, بۇل وپەراتسيانى ينسۋلت باستالعاننان كەيىنگى العاشقى 6 ساعاتتا عانا جاساۋعا بولادى, سوندىقتان اۋرۋحاناعا ۋاقتىلى بارۋ جانە ءينسۋلتتى ەرتە انىقتاۋ وتە ماڭىزدى.
«جاساندى ينتەللەكت نەگىزىندە ءينسۋلتتى اۆتوماتتى تۇردە دياگنوستيكالايتىن قازاقستاندىق ءونىم ءبىزدىڭ جۇمىسىمىزعا كوپ كومەگىن تيگىزەدى. ول باس ميىندا يشەميا وشاعىنىڭ بار-جوعىن انىقتاۋعا كومەكتەسەدى. قاراپايىم سوزبەن ايتقاندا, ميدىڭ قاي ايماعىنىڭ ولگەنىن انىقتاپ بەرەدى. يشەميا وشاعى بولماعان كەزدە كومەك كورسەتۋدى باستاۋعا بولادى. بۇل – ترومبوليز نەمەسە ترومبوەكستراكتسيا, ياعني ترومبتى جويۋ وپەراتسياسى. سونىمەن قاتار مەن بارلىق «CerebraAi» كومانداسىنا كورسەتكەن كومەگى مەن مەديتسيناعا قوسقان ۇلەسى ءۇشىن العىسىمدى بىلدىرگىم كەلەدى. مۇمكىندىكتى پايدالانا وتىرىپ, ۇكىمەتتەن وسى باعدارلاماعا نازار اۋدارىپ, كومەكتەسۋىن سۇرايمىن. ويتكەنى بۇل – سىرقاتتارعا ناقتى كومەك كورسەتەتىن باعدارلاما. جاساندى ينتەللەكت نەگىزىندە ءينسۋلتتى اۆتوماتتى تۇردە دياگنوستيكالايتىن قازاقستاندىق ءونىمنىڭ قىزمەتىن كەڭىنەن تاراتۋ كەرەك. بۇعان شەتەلدىكتەردىڭ ءوزى قىزىعۋشىلىق تانىتىپ وتىر», دەيدى وبلىستىق اۋرۋحانانىڭ نەيروحيرۋرگ-دارىگەرى اسىلبەك انۋاربەك ۇلى.
ونىڭ ايتۋىنشا, باسسۇيەكتى اشپاي وپەراتسيا جاساۋ تامىر نەيروحيرۋرگياسى دەپ اتالادى. وبلىستا مۇنداي وپەراتسيا 2022 جىلدان باستاپ قولدانىسقا ەندى. بۇل – وتە قيىن جانە قاۋىپتى. سول سەبەپتى وپەراتسيا جاساۋ ءبىر دارىگەردىڭ قولىنان كەلمەيدى. مۇنداي جاعدايدا وپەراتسيانى بىرنەشە دارىگەر بىرلەسىپ جاسايدى. بۇل قاتاردا ماقسات مۇسابەكوۆ پەن ايرات ءجۇنىسوۆ تە بار. كەيىنگى ەكى جىلدا وڭىردە 150-دەن اسا ناۋقاسقا وپەراتسيا جاسالعان. سونىڭ 95–97 پايىزى ءساتتى وتكەن.
جالپى, وڭىردە الەۋمەتتىك مەديتسينالىق ساقتاندىرۋ اياسىندا ءينسۋلتتى ەمدەۋ ادىستەرىنىڭ قارقىندى دامۋى بايقالادى. ينسۋلتپەن اۋىراتىن ناۋقاستار ساپالى ەمدەلۋگە مۇمكىندىك بەرەدى. قوسىمشا قارجىلىق شىعىندارسىز قالپىنا كەلۋگە جاعداي جاسايدى.
وسى ورايدا ايتا كەتەيىك, وڭىردەگى پسيحيكالىق دەنساۋلىق ورتالىعىنىڭ قىزمەتكەرلەرى سينتەتيكالىق ەسىرتكىدەن ۋلانعان ادام ءومىرىن قۇتقارىپ قالدى. ناركولوگتەر حيميالىق قوسپادان جاسالعان سينتەتيكالىق ەسىرتكى تۇتىنعان ناۋقاستى ەمدەگەن. ونى ءبىر رەت پايدالانعاننان كەيىن تاۋەلدى بولادى. بۇگىندە مەكەمە قىزمەتكەرلەرى ىشىمدىك پەن ءارتۇرلى زياندى زاتتارعا اۋەستىگى بار 3600-دەن اسا ادامدى تىركەۋگە العان. قازىر ورتالىقتا سولاردىڭ 64-ءى ەمدەلىپ جاتىر.
«بىرنەشە كۇن بۇرىن اۋىر حالدە تۇسكەن ناۋقاسقا دارىگەرلەر دەر كەزىندە كومەك كورسەتتى. ەم-دوم شارالارى ناتيجەسىندە ناۋقاستىڭ دەنساۋلىعى جاقسارا باستادى. بىلتىر جەتىسۋ وبلىسىنىڭ پسيحيكالىق ورتالىعى 1 712 ناۋقاستى ەمدەپ شىعاردى. سونىڭ ىشىندە سينتەتيكالىق ەسىرتكىمەن ەمدەلگەندەردىڭ پايىزدىق ۇلەسى 15 پايىزدى قۇرايدى. سينتەتيكالىق ەسىرتكىنى پايدالانۋ كەزىندە ادامنىڭ ۋاقىتقا باعدارى, قورشاعان ورتاعا, ءوزىنىڭ ءىس-ارەكەتىنە دەگەن ەسەپ بەرۋى جوعالادى. سونىمەن قاتار پسيحيكالىق دەنساۋلىعىنا ورەسكەل زيان كەلەدى», دەيدى وبلىستىق پسيحيكالىق دەنساۋلىق ورتالىعىنىڭ ناركولوگ دارىگەرى ەركەبۇلان مولداحانوۆ.
جەتىسۋ وبلىسى