ۇزدىكتەر – ينديان-ۋەللستە

ينديان-ۋەللستەگى جارىس ءوزىنىڭ ءمانى مەن ماڭىزى, مار­تەبەسى مەن دارەجەسى ­جا­نە جۇلدە قورىنىڭ مولشەرى جاعىنان «ۇلكەن دۋلىعا» ساناتىنداعى سايىستاردان عانا قالىپ قويادى. 1974 جىلدان بەرى ۇزدىكسىز ۇيىمداستىرىلىپ كەلە جات­قان وسى تۋرنيردە الەمنىڭ ەڭ ۇزدىك تەننيسشىلەرى ۇنەمى ونەر كورسەتۋدە. جارتى عا­سىر ۋاقىت ارالىعىندا ەرلەر اراسىنداعى باسەكەدە ەڭ كوپ ولجاعا كەنەلگەن شۆەي­تساريانىڭ ماقتانى­شى رودجەر فەدەرەر (2004-2006, 2013-2014, 2017 جىل­­دارى) مەن سەربيانىڭ ساڭ­­لاعى نوۆاك دجوكوۆيچ (2008, 2011, 2014-2016). ولار بەس رەتتەن توپ جاردى. ايەلدەر سايىسىندا بىردە-ءبىر ويىنشىعا ءۇش مارتە توپ جارۋ باقى­تى بۇيىرمادى. اتاقتارى الىسقا جايىل­عان مارتينا ناۆراتيلوۆا (1990–1991), مەري دجو فەرناندەس (1993, 1995), لينداس دەۆەنپورت (1997, 2000), سەرەنا ۋيليامس (1999, 2001), كيم كلەيستەرس (2003, 2005), دانيەلا گانتۋحوۆا (2002, 2007), ماريا شاراپوۆا (2006, 2013) جانە ۆيكتوريا ازارەنكو (2012, 2016) سىندى بۇرىمدىلار باس جۇلدەنى ەكى رەتتەن عانا ولجالادى.

بىلتىرعى جارىستا كۇللى الەم جۇرتشىلىعى قازاقستاننىڭ ءبىرىنشى راكەتكاسى ەلەنا رىبا­كي­­­نا­­نىڭ اسقان شەبەرلىگىنە ءتانتى بولدى. امەريكالىق سوفيا كەنين, يسپا­نيالىق پاۋلا بادوسا, رەسەي­لىك ۆار­ۆارا گراچەۆا, چەحيالىق كارولينا مۋحوۆا, پولشالىق يگۆا سۆەن­تەك جانە بەلارۋستىك ارينا سوبولەن­كو­عا سان سوقتىرعان جەرلەسىمىز تەڭ­دەس­سىز دەپ تانىلدى. ەرلەردىڭ ايقا­سى كارلوس الكاراستىڭ جەڭىسى­مەن اياق­تالدى. يسپانيانىڭ اسا دارىن­دى تەننيس­شىسى اقتىق سىندا رەسەي­لىك دانيل مەدۆەدەۆتى ۇتتى.

بيىلعى جارىستىڭ العاشقى اينالىمىندا بوس بولعان ەلەنا رىباكينا (№4) ەكىنشى كەزەڭدە ناديا پودوروسكامەن (№84) كەزدەسۋگە ءتيىس ەدى. الايدا ءدال ويىن بولاتىن كۇنى ەلەنانىڭ دەنساۋلىعى سىر بەرىپ, ول كورتقا شىقپادى. يۋليا پۋتين­تسەۆا (№79) تۇساۋكەسەر كەزدەسۋىن گەر­مانيالىق تامارا كورپاچقا (№76) قارسى وتكىزدى. بۇل ويىندا وتانداسىمىز نەمىس قىزىن وڭاي ۇتتى – 6:2, 6:3. كەلەسى كەزەڭدە وتانداسىمىز WTA رەيتينگىندە وزىنەن الدەقايدا جوعارى تۇرعان رەسەيلىك ەكاتەرينا الەكساندروۆادان (№16) ايلاسىن اسىردى – 7:6, 6:1. يۋليا ەندى امەريكالىق مەديسون كيزپەن (№18) كۇش سىناسادى.

ەرلەردىڭ تۋرنيرىندە دە جاعداي ءدال سولاي. الەكساندر بۋبليك (№20) جارىستى ەكىنشى كەزەڭنەن باستاپ, قىتايلىق تسزيۋنچەن شانعا (№139) شاڭ قاپتىردى – 6:4, 6:1. ءۇشىنشى اينالىمدا جەرلەسىمىز توپ-10 ويىنشىنىڭ قاتارىنا ەنگەن اۋستراليانىڭ وكىلى الەكس دە مينورمەن ايقاسادى. ال الەكساندر شەۆچەنكو (№45) ءۇشىن بۇل تۋرنير اياقتالدى. گەرمانيانىڭ تەننيسشىسى دومينيك كەپفەردى (№49) قاپى قالدىردى – 6:3, 1:6, 7:6. بىراق كوپ ۇزاماي ول ارگەنتينانىڭ ويىنشىسى فرانسيسكو سەرۋندولوعا (№22) جول بەردى. ەكىنشى سەتتە ەسەپ 1:3-كە جەتكەندە شەۆچەنكو باسەكەنى جالعاستىرۋدان باس تارتتى. ءسويتىپ, جارىس جولىندا ەكى جەرلەسىمىز عانا قالدى.