جيىرما ەكى جاستاعى بويجەتكەن ۆەرا پلەتنەۆا ماقال-ماتەلدەپ سويلەگەندە ءسوزدىڭ مايىن تامىزادى. ەڭبەكشىقازاق اۋدانىنىڭ اقجال اۋىلىندا دۇنيەگە كەلگەن ورىس قىزى قۇروزەك ورتالاۋ مەكتەبىنە 1-سىنىپقا بارىپ, العاشقى الىپپەنى قازاق تىلىندە تانيدى. العىر قىز الدىنا ايقىن ماقسات قويىپ, مەكتەپتەن سوڭ قوناەۆ قالاسىنداعى قاپشاعاي كوپسالالىق كوللەدجىنىڭ «مودەلەر ديزاينەر» ماماندىعىنا وقۋعا تۇسەدى.
مەملەكەتتىك تىلدە ەركىن سويلەپ, قازاقتىڭ سالت-ءداستۇر, ادەت-عۇرپىنا قۇرمەتپەن قارايتىن ۆەرا ۆلاديميرقىزىن بىلەتىندەر ونى قازاق قىزىنان كەم كورمەيدى. مەكتەپ جاسىنان ءىس-شارالاردىڭ كوشباسىنان كورىنە بىلگەن ۆەرا قاي ىستە دە بەلسەندىلىگىمەن تانىلعان. حالىق بيلەرىن بيلەپ, كورەرمەن ىقىلاسىنا بولەنگەن كەزدەرى از ەمەس. كىتاپقۇمارلىعى دا اينالاسىنا كوزىقاراقتى دوستار جيۋىنا ىقپال ەتكەن. قازىرگى كەزدە قارجى, ەكونوميكا, پسيحولوگيالىق كىتاپتاردى وقىپ, ويىن جەتىلدىرۋمەن, ءبىلىمىن-بىلىگىن ۇشتاۋمەن اينالىسىپ كەلەدى. بوس ۋاقىتىندا اعىلشىن ءتىلىن يگەرۋگە دە دەن قويا باستاعان جاستىڭ ويى ۇشقىر, تالابى تاۋداي. بيىل قاڭتار ايىنان باستاپ الماتى وبلىسىنىڭ ىشكى ساياسات باسقارماسى «قوعامدىق كەلىسىم جانە دامۋ ورتالىعى» كمم-دە جۇمىس ىستەيدى.
«ۇيىمىزدە تۋعان تىلىمىزدە سويلەسسەك تە, كوپشىلىك ورىنداردا, كوشەدە ەل-جۇرتپەن قازاق تىلىندە سويلەسۋ ادەتكە اينالعان. بۇل – مەنىڭ قاسيەتتى توپىراعىندا دۇنيەگە كەلىپ, تىرشىلىك ەتىپ وتىرعان پەيىلى دالاداي قازاق ەلى مەن جەرىنە قۇرمەتىم», دەگەن ۆەرا بالا كەزدەن ناۋرىز مەرەكەسىن اسىعا كۇتەتىنىن ايتادى.
«ناۋرىز – مەنىڭ سۇيىكتى مەرەكەلەرىمنىڭ ءبىرى. ناۋرىز كوجە جەتى ءتۇرلى ءداننىڭ قوسپاسىنان ازىرلەنەتىنىن ءالى ەستەن شىعارعان جوقپىن. ناۋرىز مەرەكەسى كەلگەندە شاڭىراعىمىزدا مىندەتتى تۇردە ناۋرىزكوجە جاسالادى. رەسەيدە تۇراتىن جاقىن تۋىسقانىمىز بار. سولار وسىدان جەتى جىل بۇرىن بىزگە ناۋرىز مەرەكەسى قارساڭىندا قوناققا كەلگەن بولاتىن. سول كەزدە انام ناۋرىزكوجە جاساعان ەدى, ولارعا ناۋرىز كوجە قاتتى ۇنادى, ءتىپتى انامنان ەرتەسىنە كوبىرەك جاساپ بەرۋدى ءوتىندى», دەپ اعىنان جارىلعان ۆەرا اۋىلداستارى مەن ۇستازدارىنا ايرىقشا لەبىزىن ءبىلدىردى.
– قازاقتىڭ ءتىلىن, سالت-ءداستۇرىن ۇيرەنۋىمە ۇلەس قوسقاندارى ءۇشىن ۇستازدارىم مەن جانىمداعى جاقسى ادامدارعا مىڭ العىس ايتامىن. كەڭ بايتاق ەلدە تۋىپ-وسكەنىمدى ماقتان ەتەمىن, قوناقجاي قاسيەتىن قۇرمەتتەيمىن. «كوپپەن كورگەن – ۇلى توي» دەمەكشى, اۋىلدا وسكەنىمنىڭ ارقاسىندا كوپپەن ورتاق ءتىل تابىسا ءبىلدىم. «باتامەن ەل كوگەرەر, جاڭبىرمەن جەر كوگەرەر» دەپ بەكەر ايتپاعان. باتا السام, باقىتقا بولەنگەندەي بولامىن. ادال ەڭبەك ەتىپ, باتا الىپ جۇرگەن ادامنىڭ جولى اشىق, مەرەيى ۇستەم بولادى. بۇل مەنىڭ – باستى قاعيدام, – دەيدى ۆەرا. – بولاشاققا جول باستاپ, ءجون سىلتەيتىن بۇگىنگى – جاستار. سوندىقتان ەلىمىزدىڭ ءاربىر تۇرعىنى كەلەشەگىمىزدىڭ جارقىن بولۋىن ويلاپ, ءارى قاراي دا ءبىر شاڭىراق استىندا تاتۋ-ءتاتتى ءومىر ءسۇرىپ, تاۋەلسىز ەلىمىزدى نىعايتۋعا ۇلەس قوسا بەرۋىمىز كەرەك.
الماتى وبلىسىندا بۇگىندە 105 ەتنوس وكىلى تۇرادى. وڭىردە 26 ەتنومادەني ورتالىق جۇمىس ىستەيدى. سونىمەن قاتار الماتى وبلىستىق قازاقستان حالقى اسسامبلەياسى جانىندا عىلىمي-ساراپتامالىق توپ, اقساقالدار القاسى, انالار كەڭەسى, مەدياتسيا كەڭەسى, جەتەكشى جۋرناليستەر توبى, كاسىپكەرلەر قاۋىمداستىعى جانە «اسسامبلەيا جاستارى» رقب وكىلدىگى جۇمىس اتقارادى. ءاربىر قۇرىلىم قوعامدىق كەلىسىمدى قامتاماسىز ەتۋگە, قازاقستان حالقى اسسامبلەياسىنىڭ ساياسي جانە ازاماتتىق ينستيتۋت رەتىندەگى قوعامنىڭ بىرلىگىن, تولەرانتتىلىقتى نىعايتۋداعى, ەتنوسارالىق كەلىسىمدى ساقتاۋداعى ءرولىن كۇشەيتۋگە ءوز ۇلەستەرىن قوسادى.
الماتى وبلىسى