8 ناۋرىز - حالىقارالىق ايەلدەر كۇنى مەرەكەسى قارساڭىندا استانا اكىمدىگىنە قاراستى بەلسەندى ۇزاق ءومىر ءسۇرۋ ورتالىعىندا «كۇمىس حانىمدار» اتتى اجەلەر بايقاۋى ءوتتى. بايقاۋعا قاتىسقان اجەلەر تانىستىرۋ, ونەر, ءسان كورسەتۋ جانە اس ءمازىرىن دايىنداۋ سىندارىنان ءوتتى, دەپ حابارلايدى Egemen.kz.
سايىس بارىسىندا ونەرلى اجەلەر وزدەرىن ولەڭ جولدارىمەن تانىستىرىپ, مونولوگ تا وقىدى. ءسان بايقاۋىندا پوديۋمعا شىعىپ كيىم ۇلگىلەرىن كورسەتكەن سانقوي اپالار كيىم ۇلگىلەرىن وزدەرى ءپىشىپ, ەكسكليۋزيۆتى تۋىندىلارىن ۇسىنعان. ال ونەر بايقاۋىندا اجەلەر دومبىرا, گيتارا, باياننىڭ سۇيەمەلدەۋىمەن ءان ايتىپ, بي بيلەدى. «اس ءۇي قۇپياسى» بايقاۋىندا ەكى سايىسكەر ءبىر تاعام ءتۇرىن ۇيىنەن ازىرلەپ كەلىپ, قازىلار القاسىنىڭ نازارىنا ۇسىندى.
بايقاۋ قورىتىندىسى بويىنشا «الماتى» اۋدانى اتىنان قاتىسقان 78 جاستاعى كۇلان مادياروۆا مەن 63 جاستاعى قادىركۇل سىزدىقوۆا ۇزدىك اتانىپ, باس جۇلدەگە يە بولدى. بارلىق جەڭىمپازدارعا مەرەكەلىك سىيلىقتار تابىس ەتىلدى.
بۇدان بودەك, مەرەكەلىك كەشتە ارىقتاۋ مارافونى مەن «اجەمنىڭ ەرتەگىسى» چەللەندجىنىڭ, «ينستاگۇل» نوميناتسياسىنىڭ جەڭىمپازدارى انىقتالىپ, ولارعا دا قۇرمەت كورسەتىلدى.
كەش بارىسىندا استانا قالاسىنىڭ ونەرلى اتا-اجەلەرىنەن قۇرالعان «ادەمى» ءانسامبلى, «جالىن» بي توبى جانە باسقا دا ونەرپازدار ونەر كورسەتتى.
بايقاۋ جەڭىمپازدارىن ماراپاتتاۋ راسىمە استانا قالاسىنىڭ كاسىپكەرلەرى قولداۋ كورسەتىپ, دەمەۋشىلىك جاسادى.