الەۋمەتتىك جەلىدە بايقاۋدىڭ ماراپاتتاۋ ءراسىمى اقىلى تۇردە وتەتىنى, قۇنى 25 مىڭ تەڭگە تۇراتىنى تۋرالى حابار تاراپ, اتا-انالاردىڭ نارازىلىعىن تۋدىردى, دەپ جازادى Egemen.kz.
جەلىدە تاراعان اقپاراتقا سايكەس, وليمپيادادا جەڭىسكە جەتكەن وقۋشىلار 25 مىڭ تەڭگەدەن وتكىزۋى كەرەك. بۇل اقشاعا جەڭىمپازدىڭ ديپلومى, توسبەلگىسى, وعان قوسا وقۋشىنى دايىنداعان مۇعالىمگە, اتا-اناسىنا العىس حات جىبەرىلەتىنى جازىلعان. دەمەك, ماراپاتتىڭ ءبارىن وقۋشى «ساتىپ الۋى قاجەت».
وقۋ-اعارتۋ مينيسترلىگىنىڭ ءباسپاسوز قىزمەتى بۇل اقپاراتقا بايلانىستى پىكىر ءبىلدىردى.
ۆەدومستۆو وكىلدەرى ۇسىنعان دەرەكتەرگە قاراعاندا, قازاقستاندا رەسمي تۇردە اۋىل وقۋشىلارىنا ارنالعان كەلەسى وليمپيادالار بار:
اۋىل مەكتەپتەرىنىڭ 9-11(12) سىنىپ وقۋشىلارىنا ارنالعان جالپى ءبىلىم بەرەتىن پاندەر بويىنشا رەسپۋبليكالىق وليمپيادا; اۋىل مەكتەپتەرىنە ارنالعان «مىڭ بالا» ۇلتتىق زياتكەرلىك وليمپياداسى جانە IQanat وليمپياداسى.مينيسترلىك تىزىمدە كورسەتىلگەن بايقاۋلار تەگىن وتكىزىلەتىنىن العا تارتتى. ايتا كەتسەك, جەلىدە داۋ تۋدىرعان «دارىندى 1000 بالا» اتتى رەسپۋبليكالىق بايقاۋ تىزىمنەن كورىنبەدى.
فوتو: Kozachkov Telegram-ارناسى
«اۋىل وقۋشىلارى اراسىنداعى «دارىندى 1000 بالا» وليمپياداسى № 514 بۇيرىققا ەنبەگەن جانە رەسمي ءىس-شارا ەمەس ەكەنىن حابارلايمىز. وبلىستىق ءبىلىم باسقارمالارىنا مۇعالىمدەر مەن اتا-انالارعا ءتۇسىندىرۋ جۇمىسىن جۇرگىزۋ تاپسىرىلدى», ۆەدومستۆو حابارلاماسىندا.