ۆانكۋۆەر قالاسىنان لوندونعا ۇشقان Air Canada اۆياكومپانياسىنىڭ Boeing 777-300 ۇشاعىن نايزاعاي سوققىسى شارپىپ وتكەن. بۇل تۋرالى nashvancouver.com سايتى حابارلاعان, دەپ جازادى Egemen.kz.
نايزاعاي سوققان ساتتەگى فوتولاردى كۋاگەر ستۋدەنت-ۇشقىش يتان ۋەست ۇسىنعان ەكەن.
ول ساباق اياقتالعاننان كەيىن تاۋلىكتىڭ قاراڭعى ۋاقىتىندا ۇشاقتىڭ ۇشىپ كوتەرىلۋىن فوتوعا تۇسىرمەك بولعان. سول كەزدە بورتتى سوققان نايزاعايدى دا قوسا ءتۇسىرىپ العان ەكەن.
ۋەستتىڭ ايتۋىنشا, باستاپقى مەزەتتە ول توسىلىپ قالعان, سەبەبى ۇشاقتى نايزاعاي سوعاتىنىن مۇلدە كۇتپەگەن ەكەن. سالدەن كەيىن ونى بۇدان ءارى نە بولاتىنى قىزىقتىرىپ, ءارى قاراي فوتوعا, ۆيدەوعا ءتۇسىرۋىن جالعاستىرعان.
اقش ۇلتتىق مەتەورولوگيالىق قىزمەتىنىڭ دەرەكتەرى بويىنشا جولاۋشىلار ۇشاعىنا نايزاعاي جىلىنا ورتا ەسەپپەن ءبىر-ەكى رەت تۇسەدى ەكەن.