قىز زورلادى دەپ ايىپتالعان تالدىقورعان قالالىق پوليتسيا باسقارماسىنىڭ بۇرىنعى باسشىسى مارات كۇشتىباەۆتى سوت زالىنان جەدەل جاردەم كولىگىمەن الىپ كەتتى, دەپ حابارلايدى Egemen.kz.
وقيعانىڭ ۆيدەوسى الدىمەن الەۋمەتتىك جەلىلەردە پايدا بولدى. زەمبىلمەن كوتەرىپ كەتىپ بارا جاتقان ادامنىڭ مارات كۇشتىباەۆ ەكەنى ايتىلعان.
«جەتىسۋ وبلىستىق سوتىنىڭ ءباسپاسوز قىزمەتى سوت وتىرىسى كەزىندە ايىپتالۋشى ك.-نى جەدەل جاردەم كولىگىمەن الىپ كەتكەنى تۋرالى اقپاراتتى راستايدى. قازىرگى ۋاقىتتا ول كارديولوگيالىق ورتالىقتا دارىگەرلەردىڭ باقىلاۋىندا. وسىعان بايلانىستى سوت وتىرىسى كەيىنگە قالدىرىلدى», دەپ ءتۇسىندىردى جەتىسۋ وبلىستىق سوتتان.
ەسكە سالايىق, وتكەن جىلى قاراشادا تالدىقورعان قالالىق پوليتسيا باسقارماسىنىڭ بۇرىنعى باستىعى مارات كۇشتىباەۆ 27 جاستاعى قىزدى زورلادى دەگەن كۇدىكپەن ۇستالدى.
وعان قاتىستى قىلمىستىق كودەكستىڭ 120-بابى 2-بولىگى (قىزمەتتىك مىندەتتەرىن ورىنداۋ كەزىندە جاساعان زورلاۋ) بويىنشا قىلمىستىق ءىس قوزعالدى. كەيىن ول ەكى ايعا قاماۋعا الىندى.